NASUMITER na sa Philippine Basketball Association (PBA) ang mga dokumento kabahin sa ilang hangyo ngadto sa Inter-Agency Task Force (IATF) nga mobalik na sa akayon gamit ang “bubble” nga konsepto ug naghuwat na lang kini sa desisyon sa maong buhatan sa gobiyerno.
Nagkanayon si PBA chairman Ricky Vargas sa interbyu sa “Power and Play” nga napasa na nila ang ilang suwat hangyo ngadto sa IATF niadto pang Septiyembre 18, 2020 ug gituohang motubag ang buhatan sulod ning semanaha.
Lakip sa gihangyo sa PBA nga tugtan na sila nga makapahigayon og 5-on-5 scrimmages.
“By Thursday or Friday, titingnan natin kung papayagan tayo mag-scrimmages dito sa Metro Manila,” asoy ni PBA commissioner Willie Marcial.
“Kung hindi, bigyan tayo ng go-signal na mag-scrimmages sa Clark, diretso na sa game. So ‘yun lang ang iniintay natin.”
Ang PBA nagplanong ibalik ang kombati sa All-Filipino Cup karong Oktubre 9, 2020 sa Angeles University Foundation (AUF) sa Clark City sa Angeles, Pampanga.
Malaumon si Vargas nga matugtan ra sila nga mobalik sa operasyon sulod sa Clark bubble gumikan kay si IATF testing czar Vince Dizon mao sab ang presidente sa Bases Conversion and Development Authority.
Nangayo sab og suporta ang PBA kang Noel Maninkil, chief executive officer sa Clark Development Corporation.
Nakighilambigit sab ang PBA kabahin ning maong lakang sa Games and Amusement Board (GAB).
“Ang kagandahan dito, we are also working with Secretary Vince and the chairman of Clark, chairman Maninkil, and also we are in touch with GAB chairman (Baham Mitra) who’s been very very helpful in seeing to it that sports continue on the professional side. So we have our fingers crossed,” dugang ni Vargas.
Gipasalig nila ni Vargas ug Marcial nga estrikto nilang ipatuman ang health protocols sulod sa bubble.
“At the end of the day, sabi nga nila, we need to follow all the IATF and the Department of Health protocols. And we will do that, we will do that. And we will patiently wait for their approval,” asoy ni Vargas.
Nagtuo si Vargas nga ang pagbalik sa aksyon sa PBA makahatag sab sa mga Pinoy og positibong panglantaw gawas sa kalingawan taliwala ning padayong hulga sa coronavirus disease 2019 (Covid-19).
Nasuspenso og sugod ang mga kalihukan sa PBA niadtong Marso ning tuiga human sa usa ka duwa sa Philippine Cup tungod sa Covid-19. (ESL)