DI lalim ang agian sa usa ka probinsiyano kon manimpad kini sa kaulohan.
Mao kini ang basi sa kasinatian ni Bisdak basketball player John Paul Erram nga lumad nga taga Cagayan de Oro City.
Gibutyag ni Erram sa interbiyu sa MVPSF Youth League-Cebu Facebook page nga daghan siya’g giagian sa wala pa niya makab-ot iyang pangandoy nga maka-abot sa Philippine Basketball Association (PBA).
“Napakahirap pag galling ka sa probinsiya, parang ignorante sa lahat, sabihin sa iyo ‘Bisaya ka punta ka dito maglinis ka’,” saysay sa 31-anyos nga big man sa TNT KaTropa.
Dugang ni Erram nga ang mga ingon ani nga panghitabo maoy mosukod kon unsa ka determinado nga molampos ang usa ka tao.
Dili angay magpakaluya kay mao lang kini ang modala kanimo paubos. Si Erram nasulod sa PBA isip usa ka 15th overall pick sa Talk N’ Text niadtong 2013 PBA Rookie Draft.
Apan na-trade siya sa Blackwater Elite (2014-2018) ug NLEX Road Warriors (2018-2019). Didto nakita ang iyang tinuod nga abilidad sa Blackwater Elite diin nag-average siya og double-double nga 12.4 puntos ubanan sa 10.9 rebounds sa 2017-2018 season.
Mipakita gihapon siya sa iyang labok sa NLEX og miposte’g 11.7 puntos ug 8.2 rebounds kada duwa.
Ang iyang maayong performance maoy nakapa-aghat sa TNT franchise nga kuhaon siya pagbalik pinaagi sa trade sa sayong bahin sa 2020.
Ang tambag ni Erram sa mga umaabot nga basketball player labi na gikan sa probinsiya mao ang magpadayon lang pagkugi ug dili nila buhian ang ilang mga pangandoy bisan paman sa mga pagsuway.
“Yung opportunity pag galing ka sa barrio is less kasi di ka naabot sa liga o mga basketball camp. Kami sa barrio never kami naabot nga mga Milo o Alaska camp dati,” matod ni Erram.
Ingon si Erram nga kadaghanan sa probinsiya, labi na sa mga layo nga gyud nga lugar, ang focus mao ang pagtrabaho og dili ang basketball.
Apan matod niya walay imposible kon mangandoy kay usa man siya sa mga players nga gikan sa probinsiya.
Nagpanikad na si Erram nga makabalik og duwa sa pagbalik sa PBA pinaagi sa “semi-bubble didto sa Clark City, Angeles Pampanga nga gikatakdang sugdan karong Oktubre 9, 2020.
“Actually gigil na talaga sa sobrang gigil wala na sa rhythm lahat. Di na nakapaglaro for ilang months so matigas na ang katawan. Puro lang kasi workouts sa nakalipas na buwan,” sigon sa Ateneo de Manila alumni. (RSC)