DAVAO DEL NORTE -- Duha ka mga armadong lalaki kinsa gituohang mga "riding-in-tandem suspects" nadakpan sa gimuntar nga checkpoint sa kapulisan sa Purok 2, Barangay Maduao, siyudad sa Panabo alas 9:00 sa buntag kagahapon, Septyembre 22, 2020.
Giila mga suspek nga sila Bambi Sere, 26, ulitawo, ug Junrey Palen Payosing, 31, kanhi sakop sa Philippine Army, parehong molupyo sa Purok 1, La Libertad, Sto. Tomas sa nahisgutang probinsiya.
Subay sa report, mga personahe sa Panabo City Police Station, pinangulohan ni Police Lieutenant Colonel Ernesto M. Gregore, uban sa intel operative ug mga personahe sa Revitalized Pulis sa Barangay nagpahigayon og checkpoint sa nahisgutang dapit nga miresulta sa pagkasikop sa mga suspek.
Subay sa taho nga nasiplatan na sa mga awtoridad ang pagsingabot sa mga suspek sa checkpoint nga gihulagway nga pulos dunay mga gikabilay nga mga sling bag sa lawas, sakay sa single nga motorsiklo.
Apan sa dihang duol na sa checkpoint, misulay paglihay ang mga nahisgutan sa dihang giduol ni Magallanes aron susihon.
Apan maayo na lang kay napugngan sila ug gikomprontahe.
Samtang gisukit-sukit, ang drayber sa motorsiklo napungot ug misulay sa pag-eskapo apan abtik siyang napugngan ni Patrolman Salvador Yurong.
Girekisa ni Yurong ang lawas sa duruha ug narekober gikan kang Sere, ang kalibre .45 nga pistola Colt MK1V nga dunay serial number 134402 nga kargado ang magazine og pito ka mga buhing bala.
Samtang narekober sab gikan kang Payosing ang kalibre .3516 revolver nga papas na ang serial number niini, uban sa upat ka mga buhing bala.
Way gikapakita nga mga legal nga dokumento ang mga suspek ngadto sa mga awtoridad, hinungdan nga gidala sila ngadto sa Panabo City Police Station, lakip ang mga ebidensiya nga nasakmit gikan kanila.
Hinuon, padayon pa ang imbestigasyon sa kapulisan kung duna ba silay kalambigitan sa mga pagpamatay sa mga giingong riding in tandem sa probinsiya.