NALISOAN gikan sa maayong pangisip ang lalaki nga namuak og mga rebulto sud sa St. James The Apostle Parish Church sa Davao City niadtong Lunes, Septyembre 21, 2020.
Subay sa blotter nga natala sa Bunawan Police Station, nga gilayon silang miresponde padung sa simbahan labot sa maong hitabo.
Sumala ni Police Major Noel Villahermosa, hepe sa Bunawan police, nga gilayon nilang nasikop pinaagi sa gihimong follow-up operation ang lalaki nga responsable sa paghimo sa krimen.
Nasuta sa kapulisan nga posibleng nalisoan gikan sa maayong mangisip ang suspek, hinungdan nga ila kini gi-turnover sa Southern Philippines Medical Center-Institute of Psychiatry and Behavioral Medicine (SPMC-IPBM), kanhi nailhang Davao Mental Hospital (DMH), diin nasuta nga duna gayoy diperensiya sa pangisip ang nahisgutan.
Mga tagdumala sa maong simbahan naningkamot nga malimpiyohan ang nagpasad nga mga buak nga rebulto nga una nang nag-trending sa social media nga Facebook niadtong Lunes. (Jeepy P. Compio)