KIDAPAWAN CITY -- Usa ka dakong banakon ang buot na untang mangatake og mga trabahante sa plantasyon sa saging ang napatay alas 2:30 sa hapon niadtong Lunes.
Matud ni Teofilo Anzano nga samtang nanghinlo sila sa plantasyon sa saging sa Barangay Meocan, Arakan, North Cotabato, hapit na nila matamakan ang dako nga banakon (King Cobra) nga nagtago sa unas.
Mibuka na ang baba sa bitin nga buot na nga moatake kanila apan maayo na lang nga abtik silang nakaispri og kemikal sa bitin hangtud nga naluya kini ug nahilo ug unya gibunal-bunalan sa ulo hangtud nga namatay.
Kahinumdoman nga niadtong miaging semana, napatay ang 16 anyos nga dalagita sa Barangay Noa, Magpet human gipahit og banakon.
Tungod niini, naghangyo ang mga molupyo sa probinsiya ngadto sa gobyerno nga unta dunay venom vaccine sa halas sa mga balay tambalanan gumikan daghan na ang namatay nga mga tawo ilabi na sa uma nga napahitan sa lala nga banakon. (Edgar E. Fuerzas)