Gihangop ni Gilas Pilipinas program director Tab Baldwin ang pagbalik sa FIBA qualifying games, ang nakaapan lang kay wala pa’y klaro kon kinsa ang mga molangkob sa Gilas squad alang ning maong kompetisyon nga gikatakda karong Nobiyembre ning tuiga ug Pebrero sa sunod tuig.
Imbes sa home-and-away format, ang kompetisyon mogamit na sab sa bubble concept sama sa gihimo sa National Basketball Association (NBA).
Wala pa gianunsyo sa Fiba kon unsa nga nasod ang mo-host sa bubble ug pila ka teams ang mokombati.
“I’m just happy to see that more parts of the world are starting to come back online, if I could use that terminology,” matod ni Baldwin nga napatik sa Spin.ph.
“The fact that FIBA wants to do it in November is a little bit of a surprise, but let’s view it as a pleasant surprise that we’re gonna get back to playing basketball. Hopefully, we can be part of the landscape of returning the world to some sort of normalcy.”
Ang tayming sa pagbalik sa FIBA qualifying games nakahatag og dakong problema sa Gilas Pilipinas, kansang kadaghanan sa mga magduduwa nagagikan sa Philippine Basketball Association (PBA).
Ang PBA nakatakda na sab mobalik karong Oktubre 9, 2020 aron ipadayon ang All-Filipino conference nga gibanabanang mahuman karong Disyembre, 2020.
Ning mga panahuna, dako pang kuwestiyunable kon ipahuwam sa PBA ang ilang mga magduduwa sa Gilas Pilipinas.
Niadtong Pebrero ning tuiga diin gipangmakmak sa Gilas Pilipinas ang Indonesia, pito ka mga magduduwa sa PBA ang naglangkob sa team. Kini mao sila si Kiefer Ravena, Abu Tratter, Poy Erram, Justin Chua, Roger Pogoy, CJ Perez, ug Troy Rosario.
Kon wala’y mga magduduwa sa PBA, seguradong magkagidlay ang Gilas Pilipinas sa 2nd window sa FIBA qualifiers.
Gipasabot ni Baldwin nga makighugpong pa siya sa national coaching staff aron hisgutan ang angayan nilang buhaton.
“We are as ready with as many scenarios that we have discussed, that you can possibly imagine,” batbat ni Baldwin. “But which one of those scenarios will ultimately be the one that we have to confront? We just can’t make decisions right now because we don’t know exactly what the landscape is.” (ESL)