KON ang duwa sa Denver Nuggets sa Game 2 niadtong Lunes (Dominggo didto sa US) maoy atong barometro, hayan makapaabot ta og laing kulbahinam na usab nga kombati karong buntag batok sa Los Angeles Lakers sa Game 3 sa ilang Western Conference Finals.
Kana kon wa sila maapektohi niadtong masakit nilang kapildihan nga maoy nagtuldok sa ilang tinguha nga matabla unta ang series.
Hinuon, kining Denver, sa niaging duha nila ka playoff matches, nakapamatuod sa ilang kalidad ug kalig-on sa ilang determinasyon. Taas ang fighting spirit.
Batok sa Utah Jazz sa first round, nabiyaan na sila sa serya, 3-1, ug nag-ungaw na sa pagkatak. Apan nakabangon kini ug mao pay mipalagpot sa Jazz, 4-3. Mao usab kini ang ilang gihimo batok sa inilog nga Los Angles Clippers.
Pero, ning nagpadayon nga playoffs kini maoy unang higayon nga naunhan ang Nuggets og kaduha, 2-0, kay batok sa Jazz ug Clippers nakatabla man sila, 1-1, sa unang duha ka duwa.
Sa ato pa lain kining pagsukod kon unsa gyud ka hugot ang ilang determinasyon.
Sama sa nasinati sa Boston Celtics sa Eastern Conference, kinahanglan nga modaog ang Denver karong buntag aron malikayan ang 0-3 nga disadvantage, butang nga sa kasaysayan sa NBA wala pay team nga nakabangon sa ingon aning sitwasyon.
Sa Game 2, diha na gyud unta sa ilang mga kamot ang kadaugan human nga si Nikola Jokic yano rang naka-iskor pinagi sa iyang baby hook atubangan ni Anthony Davis alang sa 103-102, nga labaw sa himatyong mga segundos.
Sa pagbali sa bola, nasipyat si Alex Caruso sa iyang tres ug kon nakuha pa sa Nuggets ang rebound, tabla na gyud unta, 1-1, ang series.
Pero wa kini itugot sa panahon, ug sa inbound play ni Rajon Rondo didto na nakapabuhagay si Davis sa iyang tres nga maoy nakapakaging sa kinatibuk-ang puwersa sa Nuggets, 105-103.
Sa katapusang play, daghang mibasol ni Mason Plumlee kon nganong wala niya gukora si Davis sa dihang padulong na kini midawat sa bola sa inbound play ni Rondo. Dili unta kini makaporma pag-itsa sa three-point area.
Didto man hinuon paingon si Plumlee ni Jerami Grant nga maoy nagguwardiya ni LeBron James alang sa switch defense. Naapikihan si Grant ug didto nakapahiluna si Davis sa pagpabuhagay sa iyang tres.
Klaro nga dunay miscommunication sa habig sa Nuggets.
Ngano man tuod nga mag-switch defense man si Plumlee ni Grant nga wala may mi-screened kaniya? Gawas niini, distansiya man sab ang rota nga giagian ni Davis sa gibarogan ni Grant.
Dili sa tanang higayon nga dependent ang player sa instruction sa coach kon dili importante sab gyud nga mogamit siya sa iyang common sense.
Ug kadto maoy tukma unta nga higayon alang ni Plumlee.
Sa gikaingon ko na nga ang Nuggets usa ka team nga dili madali-daling malusno ang determinasyon ug naila sa ilang pagka-fighter. Pero dili nato ikalimod nga anaa na sila karon sa peligrusong sitwasyon, 2-0, ug gawas niini, sa 22 ka duwa sa playoffs ni LeBron James diin siya nakaposte og 2-0 nga bintaha sa series, wala pa kini makatilaw og kapildihan.
We’ll see kon unsay adjustment nga pagahimoon na usab ni coach Malone ug sa Nuggets. (jun.migallen22@yahoo.com)