Dear Atty. Joan,
Sa tinuouray lang, wala ako nalambigit ining hitabo. Usa ako ka local social welfare officer ug nagpatabang lang sab ang usa ka amahan human nabalitaan niya ang nasinati sa iyang bata.
Duna siyay siyete anyos nga batang babaye. Anaa ang kustodiya sa bata sa inahan human nagbuwag sila tulo ka tuig na ang milabay. Dili sila minyo. Ang inahan sa bata duna nay bag-ong bana ug nagpabilin sila diri sa Cebu. Ang biological father duna na poy bag-ong pamilya ug nagpuyo na sa laing lalawigan.
Nasayod ang amahan nga milarga gawas sa nasod ang inahan sa bata sa miaging tuig aron magtrabaho isip domestic helper. Gibilin sa inahan ang bata sa iyang pares ug mitugot lang sab ang amahan sa maong arrangement.
Apan nahibaw-an sa amahan gumikan sa sumbong sa iyang bata nga kulatado kini sa iyang ama-ama sa mga adlaw nga hubog kini.
Wala na sab kini gi-enroll sa eskwelahan ug ang sweldo nga gipadala gikan sa iyang pares kay gigamit sa pagsugal ug pambabaye. Misumbong sab ang bata nga nahilabtan kini sa iyang ama-ama ug gihulga ang bata nga patyon kini kon musumbong.
Walay paryente ang bata diri sa Cebu, mao nga ako ang giduol sa amahan isip local social welfare officer. Dugang pa sa amahan nga maglisod siya og kuha sa bata.
Nanghinaot ako nga matambagan ug malamdagan ko nimo sa maong suliran.
Imong magtatampo,
Alicia
Dear Alicia,
Una sa tanan maayong adlaw usab kanimo diha Alicia ug salamat sa imong pagsunod niining lindog.
Subay sa imong saysay, nakasinati og physical ug sexual abuse ang batang babaye sa imong kliyente sa mga kamot sa iyang amaama ug gikinahanglan nga makaikyas ang bata sa pagpanghimulos ug pagpangabuso.
Isip usa ka local social welfare officer, kinahanglan makig-coordinate ka ngadto sa local social welfare office sa lugar kon diin nagpuyo ang amahan aron tun-an ang sitwasyon sa bata. Sa pag-assess sa maong sitwasyon, kinahanglan tan-awon ang 'best interest' sa bata.
Kinahanglan sab nga mahibalo ang inahan sa kasinatian sa iyang bata. Atong hinumduman nga ang bata kay usa ka illegitimate child tungod kay wala gaminyo ang mga ginikanan ini. Sa maong sitwasyon, walay kustodiya ang amahan ug duna ray visitation rights sa bata. Pinaagi sa pagpahibalo sa bata, mahatagan og higayon ang inahan kon kinsa ang gusto niya nga mubantay sa bata.
Kon wala gyuy available nga paryente nga mubantay sa bata, dad-on kini sa usa ka shelter o residential care isip last resort.
Dugang tambag mao ang pag-assist sa mga kaso batok sa ama-ama sama na lang sa pagkuha og saysay sa batang biktima sa pagpangabuso ug sa pag-file og mga kaso sa piskaliya. Daghang salamat sa imong sulat tampo ug hinaot nga makatabang kini sa pag-alagad nimo og serbisyo sa katawhan.
Imong alagad,
Atty. Joan
[Mahimo kamo nga mopadangat sa inyong mga suliran o pagsumbong sa kaso sa pagpangabuso pinaagi sa pag-email (clbphilscebu@gmail.com) o pag-send og mensahe sa among Facebook page nga “Children’s Legal Bureau” m.me/ChildrensLegalBureauInc (Messenger)]