DAKO na kaayo kining tabang alang sa mga musikero ug entertainers ang 25 ka kilo nga bugas nga gihatag sa kagamhanan sa siyudad sa Sugbo.
Si Cebu City Mayor Edgardo Labella nidiskurso gawas sa Plaza sa Sugbo sa City Hall atubangan sa mga musikero.
Ang mga musikero sa mga hotels, resto-bars ug ubang establisemento nawad-an og trabaho tungod sa Covid-19.
Matud ni Labella, di lang diay ang vendors ug drivers ang nawad-an og trabaho, naa man sab sila (musikero).
Nagpasalamat usab si Labella ni Konsehal Niña Mabatid nga gipaabot ngadto kaniya ang problema sa mga entertainers.
PROBINSYA SA SUGBO
Mao sab kini ang gihimo sa mga mayor ug provincial board member way hunong sa pagpaminaw sa reklamo sa mga tawo..
Sa akong interview ni 6th district Board Member Glenn Soco, daghan na usab siya ug natabangan sa mga drivers.
Mao sab ang gihimo ni Board Member Tata Salvador sa 2nd district sa probinsya sa Sugbo pinaagi sa pagtabang ni Gobernador Gwen Garcia ngadto sa katawhan.
Wa sab magpa-uwahi sa iyang kakugi si Mayor Merlou Derama sa lungsod sa Boljoon maoy nangunay sa paghatag og ayuda.
Si Derama, nga anaa na sa katapusang termino sa pagka mayor, niingon nga maayo na lang di makalimtan sa taga Boljoon ang kakugi ug pagpatuman og mga programa.
Samtang sa Lapu-Lapu City mipakita sab sa iyang abilidad si Mayor Ahong Chan pinaagi sa pagangunay ug tubag sa panginabanglan ug reklamo sa mga tawo.
Gihimo sab kini ni 6th District Kongreswoman Lollipop Ouano Dizon ug sa igsoon niini nga si Board Member Jonkie Ouano Ang pagpaminaw sa problema sa mga tawo sa distrito.
Mipakita sab sa iyang labok sila si Mayor Danny Diamante ug Bise Mayor Aljun Diamante.
Gani sa wala pa ang krisis tungod sa Covid-19 sila si Danny ug Aljun mokoot sa ilang kauglingong kuwarta aron makatabang sa mga tawo.
Wa sab magpauwahi sa ilang kakugi sila 4th district Board Member Tining Martinez ug Bogo City Mayor Carlo Martinez. efren_lonzon@gmail.com ug text 09235562777