ADUNAY memorandum nga gipagawas ang Regional Director sa Department of Interior and Local Govenrment (DILG) 7 nga si RD Leo Trovela mahitungod sa kalihokan sa mga opisyal sa kagamhanan o authorized persons outside residence (Apor) nga mosulod-mogawas sa lainlaing lugar sa rehiyon kalabot sa ilang mga trabaho.
Gimando niini nga sumala sa gilatid sa Inter-Agency Task Force for the Management of Emerging Infectious Diseases (IATF-MEID), dili na mahimo nga ipahamtang pa kanila ang 14 ka adlaw nga kwarantinas aron mapadayon nila paghimo ang ilang mga importante nga mga trabaho sa kagamhanan ug katawhan.
Ang pangutana, gituman ba kini sa local chief executives sa tibuok rehiyon?
Sa akong nahibaw-an, bugtong ang lalawigan sa Cebu lang ang mituman niini.
Ang uban, padayon sa ilang gilatid nga pagkwarantinas sa mga Apor nga mosulod sa ilang tagsatagsa ka mga lalawigan.
Buyno, duna akoy nahibaw-an nga gitugotan nga makasulod pero daghan og mga kondisyon nga gipahamtang.
Kinahanglan sundon ang maong mga kondisyon aron makalikay sa “preso” sulod sa 14 ka adlaw.
Dunay usa ka probinsiya nga istrikto kayo sa ilang pagpasunod sa kwarantinas.
Matod sa mga doktor, dili sila mahimo nga mo-issue og medical certificate kay bugtong ang Provincial Health Officer (PHO)lang ang mopirma sa medical certificate, ug walay lain.
Kon wala ang PHO, mahimo ba nga pirmahan og lain, dihay nangutana.
Dili, kay siya ra gyod og wala nay lain nga mopirma sa medical certificate. Usa ra ka adlaw ang effectivity sa maong medical certificate, dugang pa nga pagpasabot.
Kon gikinahanglan nimo sa Lunes, angay lang nga Lunes sab nimo kuhaon ang medical certificate kay dili na kini dawaton sa Coast Guard kon molapas og usa ka adlaw, matod pa sa taga-PHO.
Sa dihang mihukom ang nangutana nga mokuha na lang siya sa medical certificate ana mismong adlawa, dalidali nga naghimo og medical certificate ang maong empleyado.
Dako ang kahikurat sa nagkuha sa dihang gipirmahan sa empleyado ang ibabaw sa ngalan sa PHO.
Ingon ka, Ma'am, nga ang PHO ra ang pwedeng mopirma sa medical certificate, gipirmahan man lagi nimo, nangutana ang naglukat?
Wala na motubag ang empleyado, milakaw lang.
Lisod ning klaseha sa empleyado kon maoy magdaghan.
Duna kahay mahitabong pagpuli sa Speaker of the House gikan kang Alan Peter Cayetano ngadto ni Lord Velasco?
Sa 5 ka congressman nga akong gipangutana, lainlain ang ilang mga tubag.
Duha ang miingon nga madayon, ang usa misulti nga wa pay klaro ug ang duha miingon nga morag wala.
Pasabot lang nga mismo sila nga mga miembro sa kongreso wala masayod kon unsa gyod ang mahitabo.
Midugang ang usa sa pagsulti nga si PRRD ra gyod maoy makatubag ana.
Nganong si PRRD man nga klaro man ang sabot nila ni Cayetano ug Velasco, 15 ka bulan ka Cayetano ug 21 ka bulan ka Velasco? Wala na motubag ang congressman.
Pagkalisod sabton noh, bisan duna nay kasabotan, si PRRD lang gihapon ang lisudlisoron.
Maayo unta og moingon si Pres. Rodrigo Roa Duterte (PRRD”) nga “ayaw ko’g labda, oy!”