SUPERBALITA CEBU

Love triangle ‘motibo’ sa pagpatay sa manghihilot

■ GIPATAY: Nagluko daplin sa karsada sa Barangay Prenza, Balamban ang lawas ni Dionesio Otapil, 48, nga naputos sa mga samad pinusilan. Duha ka mga lalake nga nagmotorsiklo ang gitumbok nga killers. / Tampo sa Balamban Police Station

MANGHIHILOT namatay human gipusil sa duha ka mga lalake nga nagsakay sa motorsiklo sa Martes sa alas 4:30 sa kaadlawon, Septiyembre 22, 2020, sa Sitio Lacdon, Barangay Prenza, lungsod sa Balamban.

Love triangle ang gitan-aw nga motibo sa pagpatay kay giingong daghang mga babaye ang gikarelasyon sa biktima.

Si Dionesio Candia Otapil, 48, minyo, taga Sitio Lingatong, Brgy. Vito, Balamban namatay diha-diha sa mga samad pinusilan sa ulo ug kalawasan.

Nakalingkawas ang iyang ig-agaw nga si Vingie Candia,26, ulitawo, kinsa natapsingan.

Si Major Christian Torres, hepe sa Balamban Police Station nga nahinabi sa Superbalita Cebu, nagkanayon nga si Otapil nag-angkas sa motorsiklo nga gimaniho ni Candia gikan sa Brgy. Vito kay duna untay anhaon sa lungsod.

Apan sa ilang pagliko sa eskinita, alang sa main road sa Prenza, kalit lang silang gipamusil sa duha ka mga lalake nga nagmotorsiklo.

Tungod niini, natumba sila sa daplin sa karsada.

Ang mga killer nikanaog, gitiwasan sa pagpusil si Otapil tumong sa ulo. Human niini, wa na masuta kon diin nipadulong ang mga killer.

Si Candia nibutyag nga wa siya makaklaro sa nawong sa mga killer kay nipasok nalang siya sa daplin sa karsada. Si Candia natapsingan ra sa liog.

“Love triangle ang gisubay nato nga motibo sa kremin, kay kining biktima daghang babaye nga gikarelasyon,”dugang ni Torres.

Ang mga kabanay ug mga silingan nibutyag sa kapulisan nga buotan si Otapil, way kontra. Apan nahibaw-an nila nga duna sab kini mga babaye nga gikarelasyon sa Mindanao, samtang nanambal siya isip albularyo. Mipauli diha sa Balamban, nipadayon sa pagpanambal sa binisiya.

Usa sa ilang nakuhang impormasyon nga bag-uhay lang dunay gitambalang babaye nga minyo ug gikatahong wa na mopauli sa balay. Giingong nasuko ang bana kay ang babaye nitipon na kang Otapil.

Hinuon kining maong impormasyon ila pang palawman, dugang ni Torres.

Ang kapulisan nakarekuber sa crime scene sa 23 ka nga kabhang sa bala sa kalibre .45 nga pistola, ingon man slug. (GPL)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph