Subay sa mga bag-ong pamaagi sa paglikay sa kagaw sa coronavirus disease, ang Cebu South Bus Terminal (CSBT) management mogamit na sa electronic ticketing system.
Kini human giaprubahan sa Hunta Probinsyal ang pagpirma sa Kagamhanan sa Lalawigan sa Sugbo og kasabutan tali sa kompaniya nga mo introduce sa maong serbisyo.
Ang electronic ticketing system gitinguha nga ipatuman ni Cebu Governor Gwendolyn Garcia aron pagpalambo sa serbisyo sa terminal.
Subay sa resolusyon nga gipangamahanan ni Bokal Glenn Anthony Soco nga gisagop sa Septiyembre 21, 2020, gihatagan sa Hunta Probinsyal og katungod si Garcia sa pagpirma sa kasabutan tali sa Topline Hi-Tech Synergy Corporation alang sa disenyo, supply, installation, operation ug maintenance sa centralized ug automated nga ticketing system sa terminal.
Gihimug-atan sa resolusyon nga labing mahinungdanon kini nga gamiton ning panahon sa pandemya.
“With the continued strict implementation of the health and safety protocols in the Province of Cebu, there is a need to modernize ticket purchase, passenger handling and management procedures through user-friendly technology that would help the bus terminal especially during peak hours when congestions are observed," matod sa resolusyon.
"With the current pandemic brought about by COVID-19, there is a need to provide comfortable, safe and efficient accommodation service in the conduct of the distribution of tickets and the handling of the riding public with the re-opening of The Cebu South Bus Terminal," kini nidugang.
Ang Topline nakahatag na sa ilang unsolicited proposal diin mahimo na nga molagda og kasabotan ang Kagamhanan sa Lalawigan sa Sugbo sa pagpatuman sa bag-ong sistema.
Sigon sa impormasyon gikan sa Kapitolyo, gikatakda unta nga ipaubos sa Swiss challenge ang original proposal sa Agusto 24, apan way entries nga nisukol niini.
Sa pasiunang mga interbyu ni Garcia, iyang gipasabot nga kon maaprubahan na ang maong sistema, di usab kini largo nga ipatuman tungod kay kinahanglan pa nga kat-unan usab sa mga pasahero nga wa pa makasuway sa maong paagi, ilabi na sa mga tiguwang.
Hinungdan nga bisan pa man og mopagawas na og cards, may mga ticket gihapon nga ibaligya sulod sa terminal sa unang buwan sa pagpatuman.
Ang cards, susama sa cards nga kasamtangang gigamit karon sa ubang bus lines diin kinahanglan nga sudlan nimo og load ug ang tapping device na ang mokaltas alang sa plitehan nga magdepende gihapon sa gilay-on sa imong destinasyon.
Ang pagpatuman sa maong paagi napugngan nunot sa community quarantine restrictions gumikan Covid-19 nga nisangko sa temporaryong pagkasira sa terminal.
Sayo ning buwana, gibuksan pagbalik ang terminal.(ANV)