SUPERBALITA CEBU

Sugilanon: Ang babaye sa akong kama

LAMBERTO G. CEBALLOS

Cawayan, Dalaguete, Cebu


GIKAN ko nga mitambong sa ‘birthday party’ sa akong ig-agawng si Lukas. Igo-igo ra ang beer nga akong nainom; igo gud nga ako makapauli nga dili magsusapinday. Ang iyang balay duol da sa dalan. Migawas ko sa geyt ug nag-atang og taksi. Dihay taksi nga hinay nga mipaduol sa akong gitindogan. Gipara nako ug misakay dayon.

“Asa, Dong?” matod sa drayber nga hamtong na.

“Sa Cogon-Ramos, Tay,” tubag ko.

Miandar ang taksi ug misubay sa mga dalan paingon sa barangay Cogon-Ramos. Gipahunong ko ang taksi tungod sa F. Ramos Public Market ug mikawas ko human kabayri ang plete. Milabang ko sa atbang nga daplin sa dalan ug misulod sa bukana sa gamayng dalan paingon sa interyor sa among sityo diin nahimutang ang among balay. Serado na ang pultahan sa ubos nga bahin sa balay diin nahimutang ang sala ug kusina, apan nagsiga pa ang mga suga, hasta ang mga suga sa itaas diin nahimutang ang duha ka lawak-katulganan.

Gikuot ko ang ‘keyholder’ gikan sa wala nga bulsa sa akong maong jeans. Giablihan ko ang pultahan. Misulod ko human serhi og balik ang pultahan ug naghubo sa akong sapatos. Gibutang ko kini sa kilid sa seradong pultahan ug gisul-ob ang akong sinelas. Dayon hinay kong misaka sa itaas.

Sa pag-abli ko sa akong lawak nauknol ko sa akong nakita. May babaye nga naghigda sa akong kama. Matahom nga babaye. Nagsul-ob siyag nipis nga sapot pangkatulog, mao nga nakita ko ang tibuok bayhon sa iyang lawas. Pution ang iyang pamanit ug taas ang buhok nga mitabon sa iyang ugdo nga dughan. Gitulon ko ang akong laway samtang nagtan-aw kaniya nga nahinanok kaayo sa katulugon. Ug nahinumdom ko kang Lowella.

Uyab nako si Lowella ug kauban mi sa ‘accounting firm’ nga among gialagaran. Pulos kami CPA nga mga ‘extenal auditor.’ Duha na ka tuig ang among relasyon isip managhigugmaay. Kanunay kaming mo-check in sa motel aron pagbug-os sa among gugma. Gusto nako siyang pakaslan.

“Let’s get married, Hon!” matod ko usa ka higayon niana human sa among pagminahalay sulod sa usa ka lawak sa motel.

“No, Hon. Di ko. I’m not the marrying kind!” tubag ni Lowella. “Kon mao na, mag-live in na lang ta.”

“Mao ra na gihapon. Parehas ra na nga minyo ta. I want freedom. Pero, di man ka angay mag-selos. Ikaw da man ang lalake sa akong kinabuhi karon.”

“Yes, pero inigkakita nimog lain, manyana poren na ko!”

“Okey ra man pod kon makakita kag laing babaye nga ipuli nako. You’re free to marry anyone you like.”

Unya naggakos mig usab ug nagtapot sa makausa pa ang among mga ngabil.

KARON gitutokan ko ang babaye nga nagbulangyod sa akong kama. Ug nahinumdoman pod nako si Thelma. Klasmeyt mi sa hayiskol ug nagka-uyab mi dihang dinha na mi sa ikaupat nga tuig sa hayiskol. Pero, human sa among gradwasyon nagkabuwag mi kay ninglalin man ang iyang pamilya ngadto sa Davao kay ang iyang amahan usa man ka ministro sa INK nga maoy among tinuhoan ug didto na sab kini gi-asayin.

Apan wa damha niadtong miaging unom ka buwan nagkasugat ang among mga dalan ni Thelma didto sa usa ka Mall. Naghimamatay mi sulod sa usa ka kan-anan. Nadipong ang dinagaang sa daang pagbati nga gihambin gihapon sa among mga dughan. Abogada si Thelma ug nag-alagad isip ‘partner’ sa usa sab ka abogada nga taga Sugbo.

Gihubo ko ang akong mga sapot ug nag-ilis og padyama. Midulog ko paghigda sa babaye nga diha sa akong kama. Gigakos ko ang akong asawa. Tulo na ka buwan sukad sa among kasal.

Siya si Thelma.

(KATAPUSAN)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph