Kapulisan nangandam sa ‘new normal’

KAPULISAN sa Central Visayas nangandam sa “new normal” kon mahukman sa national Inter-Agency Task Force (IATF) nga libkason ang modified general community quarantine (MGCQ) human sa Septiyembre 30, 2020.

Ang tibuok Sugbo ubos sa MGCQ hangtod sa Septiyembre 30, 2020. Sa mga quarantine status, ang MGCQ mao ang labing lugak.

Bisan kon mag-new normal, gipaneguro ni Police Brigadier General Albert Ignatius Ferro, hepe sa Police Regional Office 7 (PRO) 7, nga ipadayon nila ang hugot nga pagpatuman sa minimum health standard samtang wa pay bakuna.

Matod ni Ferro nga magpaabot pa ang IATF Cebu sa desisyon sa IATF sa kaulohan kon angay na bang luagan ang sitwasyon sa Sugbo.

Atol sa meeting sa gabinete ni Presidente Rodrigo Duterte sa Martes, Septiyembre 22, wa pay nahingpit nga lagda nga ipatuman kon libkason na ang MGCQ sa ubang bahin sa nasod.

“Whatever the IATF national would be telling us, we will follow it here in the regional level and of course the new policies of the new normal will be disseminated to everybody,” matod ni Ferro.

Apan iyang gipasabot nga samtang di pa moabot ang coronavirus disease (Covid-19) vaccine, hugot pa gihapon nga ipatuman ang minimum health standard tungod kay mameligro ang katawhan kon pasagdan sa kapulisan.

Kon ipaubos na sa new normal ang Sugbo, gipanglantawan nga modagsa na usab ang daghang mga tawo lakip na ang pagbalik sa public transport hinungdan nga sila nangandam.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph