TULO ka mga government vehicle ang giapil og clamp sa mga operatiba Cebu City Transportation Office (CCTO) nga nalakip sa 125 ka mga sakyanan nga nag-overnight parking sa lainlaing karsada sa dakbayan sa Sugbo sa Septiyembre 23, 2020.
Si Alma Barandog-Casimero, pangulo sa CCTO, nagkanayon nga ilang gi-clamp ang garbage truck sa Barangay Calamba, Capitol Site ug firetruck sa Barangay Labangon gumikan sa kalapasan sa City Ordinance Number 1664 nga maoy magsilot sa mga sakyanan nga mag-overnight parking.
“This department will not tolerate any violation committed by government officials/employees/government offices on order to be fair to the general public,” padayag ni Casimero pinaagi sa CCTO official Facebook page.
“Bisan og gipanag-iya pa sa gobyerno basta maka violate sa trapiko,dili jud makalingkawas sa atong ipahamtang nga silot. Kaganihang kaadlawon ( Septiyembre 23) naay tulo ka red plate nga among gi clamp-an,” dugang ni Casimero.
Ang CCTO naka-clamp usab og mga private vehicle sa dalan R.padilla (1); Oprra Unit 5 (30); Fuente (1); Doña Maria (10); Punta Princesa(4); I.Tabura (7); Sabellano (1); Alta Vista(10); Tisa (2); Bulacao(2) G. Garcia (4); Katipunan(6); Labangon (18); A.Lopez (14); Basak (5); N. Bacalso (1); F.Llamas (3); B. Rodriguez (1); Robinson Galleria (1).
“Palihug lang sa pag settle sa inyong mga violation sa among opisina dinhi sa 2nd Floor Ramos Public Market, kay kon dili, amo napud ng towingon kay makabalda man kana sa trapiko,” awhag ni Casimero.
Gihangyo sab niya ang mga barangay kapitan nga di i-park daplin sa karsada bisan pa og mga red plate sanglit sama ra kini og ikatampo sa pribadong sakyanan nga makaali sa dalan. (PAC)