ANG House committee on games and amusement nihangyo sa Inter-agency Task Force for the Management of Emerging Infectious Disease (IATF) nga ikonsiderar ang pagbukas o pagpabalik sa sabong o tari. Sila si Kongresista Joseph Bernos sa Abra ug Kong. Sonny Lagon sa Ako Bisaya Partylist nga mao ang chairman ug vice chairman sa maong komitiba, nagkanayon nga ang ilang aksiyon isip usab pagsanong sa hangyo sa Federation of Gamefowl Breeders Association.
Sukad sa pagpaubos sa nasud sa enhanced community quarantine (ECQ) niadtong Marso hangtod karon, gisirad-an ang mga sabongan o gallera sa tibuok nasud. Mao nga misiaw ang tigbakay kay wa na may legal nga sabong gumikan sa pagdili sa tapoktapok. Nahibawo na mo sa sitwasyon sulod sa mga sabongan. Nagsagol ang mga tawo ug sigurado nga dili makaobserbar og social distancing. Nagtuasik pa nang laway sa mga masyador o kristo.
Gumikan sa pagsira sa mga sabongan, daghan ang naapektuhan. Ang breeders o tigbuhi og mga manok igtatari, mga kristo o masyador, tigtaud og buwang ug ang mga tig-supply og feeds. Pero di ta motuo ani sa taga feeds industry nga apektado sila. Ngano man? Adunay tari o wala, pakan-on man gihapon nimo ang mga manok. So, naa gihapon silay halin. Of course, apektado ang mga sugarol. Nakatampo usab kini og dako sa revenue sa kagamhanan. Aw, okey man ni ba, basta mosagop sila sa new normal. Ang gidili ani mao ang dakong panagtapok.
Sa daghang psychologists ang gipangutana, unsa ba ang mag-agni sa usa ka tawo sa pagpanugal? Ang tubag: good mood or positive mood. Ug kon mas positibo ang iyang mood, mas mosaka sab ang iyang pagrisgo sa pagpusta sa sugal. Kitang mga Pinoy dili paiwit kon sugal ang hisgutan. Labi na sa buwang nga bahalag dakpunon. Bahalag magginukdanay sa kasagbutan.
Mosuyla gihapon ang kakulba ug kahinam nga bation sa mga sugarol sa manok. Ug ang Covid 19 ra ang nakapugong sa nangatol nga mga kamot sa mga sugarol nga ning tungura, naghigwa-os nga molabay na kining pandemya aron wa nay makababag pa sa pagpadayon ning maong nasudnong bisyo, ang sugal sa tari o sabong sa manok.
(bobbygnalzaro@gmail.com)