MOABOT sa 22 ka mga boatmen sa dakbayan sa Lapu-Lapu ang nagpositibo sa coronavirus disease 2019 (Covid-19) sa gipahigayong sunodsunod nga swab test sa kagamhanan ngadto kanila sa milabayng duha ka semana.
Mao kini ang gikompirmar ni Grace Mary Carungay, ang epidemiological surveillance officer sa Lapu-Lapu City Health Office.
Ang 19 sa nagpositibo gikan sa isla sa Olango, samtang 3 ang gikan sa Maribago sa mainland sa Lapu-Lapu.
Moabot sa 818 ka mga boatmen sa isla sa Olango ang gipaubos tanan sa swab test sa kagamhanan.
Samtang, moabot sa 140 ang mga boatmen ang gipaubos sa Brgy Maribago.
Wala hinuoy nag positibo sa moabot 65 ka boatmen mga gipaubos sa swab test sa Barangay Marigondon ug sa 40 sa Barangay Punta Engaño.
Gibutyag ni Carungay nga duha sa nag positibo anaa gipahimutang sa Sta Rosa District Hospital samtang ang 20 anaa sa isolation facility sa kagamhanan nga anaa mahimutang sa Barangay Gun-ob.
Ipaubos sila sa 14 ka adlaw nga isolation ug huwaton nga hingpit na silang ma Covid-free una mahimong makadawat unya ug mga turista sa higayon nga ablihan na amg turismo sa dakbayan.
Ang wala mag positibo mahimo nang maisyuhan ug ID sa kagamhanana alang sa pagpanawat ug mga turista sa higayon nga buksan na ang turismo sa dakbayan.
Ang pagpa-swab sa mga boatmen sa dakbayan maoy paagi nga masigurong Covid-free ang manawat ug bisita sa dakbayan. Ila na usab nga nasayran kinsa ang mga closed contact sa boatmen.
“Kato man gud pag Covid wala na ni sila mag boatmen nagsige gihapon sila pangisda unya ila usab nga ipangtumod,” pagpasabot ni Carungay kun diin posibleng nakuha sa boatmen ang Covid.
Niadtong Septiyembre 23 katapusang gipaubos sa swab test ang boatmen sa Barangay Mactan.
Kabahin kini sa pagpangan dam sa pag-abli sa turismo sa dakbayan. (GCM)