Ciar: Mga Bisaya nag-trending

Charlie Kit Arcelo
Charlie Kit Arcelo

SILA ang mga Bisaya Rising Influencer nga nakahimo karon og pangan sa social media nga gipangulohan sa ilang talent agency nga Cebu Young Talent. Unsay ilang gihimo nga nakapaukay sa social media? Nia ang ilang estorya sa Ssssuper Ka!

CHARLIE KIT ARCELO

Si Charlie Kit Arcelo duna nay kapin 15 million accumulated views sa YouTube ug Facebook ug kada-adlaw padayon pa ning napun-an.

Ang pinaka-nag-viral niya nga video kadtong nagkanta siyag “Having You Near Me” sa Air Suppy sud sa ilang classroom sa ACLC College of Ormoc diin siya nagtungha sa wa pa ang pandemya.

“Ang akong maestra ang nag-video unya naa akong mga classmate nga deadma lang. Haha..,” paambit sa 17-anyos nga Grade 11 na unta karon nga school year.

“Wala ko na-enroll kay na-stranded ko karon dire sa Manila tungod aning Covid,” butyag pa niya.

Si Charlie Kit Arcelo napunta sa Manila tungod sa imbitasyon usab sa talent scout nga nakakita sa iyang potential sa pag-awit pinaagi sa video.

“Niapil ko sa The Voice Teens 2020 sa ABS-CBN ug naka-guest pud ko sa Wowowin ni Kuya Wil (Willie Revillame). Nagdako ko sa Ormoc apan nibalhin ko sa siyudad sa Sugbo pag-trending sa akong mga video,” asoy niya.

Si Arcelo naka-perform sa Japan International Artfair sa IEC, Convention Center, Halad Inasal sa Talisay, Danao Concert for a Cause ug uban pa.

“Mao na jud ni akong hilig sukad pagkabata. Akong management ang ni-encourage nako maghimo og YouTube channel.”

Gihulagway niya ang iyang pagkanta ug pagka-YouTuber nga stepping stone aron makahuman sa iyang pag-eskuwela ug makatabang sa iyang pamilya.

YAD ROBAL JAYME

Si Yad Robal Jayme duna nay kapin 1 million accumulated views sa YouTube ug Facebook.

Ang nag-viral niya ang iyang mga original composition nga Binisaya nga naglakip sa “Puwede Na Ba” ug “Di ko Gusto Mobiya.”

“Naka-relate tingali sila kay most of my compositions pang-millennial jud nga bahin sa love ug ups and downs sa relationship,” dason sa 19-anyos nga Sugbuanon.

“Akong mama taga-Suba, Liloan. Pero naa sad mi balay sa Cambaro, Mandaue kay naa man diha ang kaliwatan sa akong papa.”

Si Yad Robal mag-Grade 12 na unta sa karon nga school year apan tungod sa nag-trending niyang mga video mas gipili niyang dawaton una ang mga niabot nga oportunidad.

Una siyang nakahimo og pangan dihang nag-grand champion siya sa ABS-CBN Singing Bebe Boy 2017 ug isip Top 7 finalist sa Sinulog Idol. Karong tuiga nahimo siyang contender sa Tawag ng Tanghalan segment sa It’s Showtime.

Si Yad nahimo nang front-act sa concert sa December Avenue ug Silent Sanctuary sa IEC, Convention Center, John Roa Concert, Maja Salvador Concert, ug regular usab siya niadto sa “Kapamilya Mas Winner Ka.”

ROI BERMUDEZ

Si Roi Bermudez nag-trending sa iyang acoustic versions nga “Perfect” (Ed Sheeran) ug “I’m All About You” (Aaron Carter).

Ang 21-anyos nga acoustic singer dunay 1 million accumulated views apil sa uban pa niyang cover versions.

“Sa balay ra ko permi mag-record kay hilig na gyud kog kantakanta sukad bata pa. Pero bag-o pa lang ko aning YouTube. Mas active ko sa Facebook ug Twitter,” asoy pa niya.

Si Bermudez nadiskubre dihang nahimo siyang Grand Champion sa Cebu Young Talent Singing Quest. Nahimo sad siyang contestant sa “Singing Gwapo” sa ABS-CBN ug front-act sa mga concert sa December Avenue ug Silent Sanctuary ug Boyband Tristan Ramirez.

Sa pagkakaron busy si Bermudez sa review sa umaabot niyang Civil Engineering licensure board examination.

“Para makatrabaho ug makatabang sa akong pamilya pero dili nako hunungon akong pagkanta kay mao nay akong kalipay,” padayag ni Bermudez nga lumad nga taga-Minglanilla.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph