ANG Lancet Covid-19 Commission niila sa Pilipinas nga apil sa 37 ka mga nasod nga dunay moderate nga pagpanakod sa coronavirus disease (Covid-19) ug niila kang Presidente Rodrigo Duterte nga usa sa tulo ka mga lider sa kalibutan nga “medical populist.”
Sa usa ka pamahayag nga giluwatan sa Septiyembre 14, 2020, ang commission niingon nga 19 sa 91 ka mga nasod nakapugong sa pandemic samtang 11 ang giila nga dunay taas nga pagpanakod base sa bag-ong mga kaso matag million sa populasyon matag adlaw.
Ang nasod giila nga “in suppression” kon dunay lima o mas minos pang mga kaso matag million sa populasyon kada adlaw. Kadtong dunay taas nga mga pagpanakod dunay 100 o mas daghan pang mga kaso matag million sa populasyon matag adlaw.
Mga nasod nga dunay 10 o mas minos pa matag million sa populasyon matag adlaw dunay ubos nga transmission samtang kadtong dunay 50 ngadto sa 100 ka bag-ong mga kaso matag million sa populasyon matag adlaw dunay taas nga transmission kun pagpanakod sa sakit.
Ang Pilipinas ug 36 ka laing mga nasod giila nga dunay moderate transmission dunay 10 ngadto sa 50 ka bag-ong mga kaso matag million kada adlaw.
Matod sa commission nga ang pandemic mahimong mapugngan pinaagi sa non-pharmaceutical transmission (NPI) sama sa pagsul-ob og face masks, testing ug contact tracing.
Ang commission nanawagan sa pulitikanhong mga lider sa pagsulti kanunay sa ilang mga lumolupyo sa pagsul-ob og face masks ug uban pang mga NPI aron pagpugong sa pandemic.
Apan kini nga mga intervention, hinuon, kinahanglang sundan sa luwas ug epektibong mga bakuna.
Matod sa commission nga ang medical populism usa sa mga rason sa kapakyas sa pagkontrolar sa Covid-19 pandemic.
Ang Pinoy nga doctor ug medical anthropologist, Gideon Lasco, kinsang artikulo gitumbok sa Lancet commission, nihulagway sa medical populism nga “simplifying the pandemic by downplaying its impacts or touting easy solutions or treatments, spectacularizing their responses to crisis, forging divisions between the ‘people’ and dangerous ‘others’, and making medical knowledge claims to support the above”.
Tungod sa medical populism, ang commission niingon nga ang pagsul-ob sa face masks nahimo nang pamulitika sa pipila ka mga nasod.
Si Duterte, hinuon, kanunay nagpahinumdom sa kamahinungdanon sa pagtuman sa health safety protocol sama sa pagsul-ob og face masks ug physical distancing.
Ang paggamit sa masks ug face shields mandatory sa pagsakay sa pampublikong mga sakyanan, malls ug uban pang mga dapit sa patigayon ug uban pang pampublikong mga lugar sa Pilipinas. Mga pasahero sa publikong mga sakyanan gikinahanglan nga magdistansya og tag usa ka metro.
Gidili usab ni Duterte ang face-to-face nga mga klase hangtod duna nay bakuna batok sa Covid-19 nga magamit.
Laing medical populist leaders nga gitumbok ni Lasco mao sila si US President Donald Trump ug Brazilian President Jair Bolsonaro. (MVI, Sunstar Philippines)