Kapulisan sa Minglanilla nanghatag og face masks

INAY mangdakop ang mga pulis sa lungsod sa Minglanilla sa mga tawo nga wa mag sul-ob og face masks, nang-apod-apod na lang sila niini sa mga barangay sa lungsod.

Si Police Major William Homoc, hepe sa kapulisan sa Minglanilla, maoy nangu sa pagpanghatag ug paglibot sa kabarangayan sa Miyerkules, Septiyembre 23, 2020.

Dungan sa paghatag sa mga face mask, gipahimangnuan usab ni Homoc ang publiko nga di igong rason ang kalisod ug di makapalit og mask ug di na lang mosunod sa mga health protocol.

Dugang ni Homoc nga bisan sa ilang pagpanghatag og face masks, wa kini magpasabot nga di na sila mangdakop sa wa magsul-ob.

“Kon si kinsa ang makit-an nga dili gihapon magsul-ob og face mask, hayan dakpon gyud namo kay aron magmatngon,” pahimangno ni Homoc.

Niadtong Abril 14, 2020, ang Minglanilla Municipal Council nipalabang sa ordinansa nga magpahamtang og multa sa di magsul-ob og mask samtang naa kini ubos sa community quarantine.

Mga makalapas nga masakpan nga wa magsul-ob og masks sa publikong mga lugar multahan og P300 sa unang paglapas ug P500 sa ikaduha ug mosunod pang mga kalapasan.

Ang pagpang hatag og face masks sa kapulisan ngadto sa mga barangay pagpakita sa katawhan nga ang kapulisan naglantaw sa kaluwasan sa publiko.

Niadtong miaging semana, kapin sa 100 ka mga tawo ang nadakpan sa mga pulis sa lungsod tungod sa wa pagtuman sa health protocol. (BBT)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph