SIKOP ang duha ka mga lalaki atol sa hiniusang entrapment operation sa Talomo Police Station ug sa Criminal Investigation and Detection Group-Davao City Field Unit (CIDG-DCFU) alas 5:15 sa hapon niadtong Martes, Septiyembre 22, didto sa A Mall sa Ecoland, Quimpo Boulevard, Davao City.
Kasong pagsupak sa Article 177 sa Revised Penal Code kun mas nailhang Usurpation of Authority or Official Function ug ang kalapasan sa Article 315 sa Revised Penal Code - Estafa ang atubangon sa duha ka suspek nga sila alyas Mark ug alyas Henry, pulos hamtong ang pangedaron.
Mokabat sa P230,000 ang gihimong marked money sa nagtakuban nga pulis nga positibong gidawat sa mga dinakpan bugti sa bayad sa pagproseso sa petisyon sa Annulment of Marriage.
Nasayran nga nagpaila ang duha ka suspek nga sila mga awtorisado nga moproseso sa Annulment of Marriage sa usa sa ilang mga kliyente nga mobayad unta niadtong mga taknaa sa kantidad ng P230,000.
Una niini, usa ka impormasyon ang naabot sa awtoridad dihang nagkatag sa post sa social media labot sa petition for Annulment of Marriage nga nakalapas sa legal ethics.
Giaksiyonan dayon kini sa awtoridad sa pamasin nga duna na silay daghang nabiktima niini.
Nagpahimangno ang awtoridad nga di magpailad sa ingon niini nga pamaagi, ug sutaon una ang mga legalidad sa ilang mga katransaksiyon.