GANAHAN ba mo moadto sa Sagada sa Mountain Province aron magpabugnaw?
O ang pagtaak sa Mount Pulag sa Benguet, Ifugao o Nueve Vizcaya aron mosud-ong lang sa bagang panganod?
Apan gumikan kay anaa pa kita sa community quarantine o apike usab sa budget paingon sa sa nagdaiyang dapit lisod pa kini makab-ot resulta sa Covid-19 pandemic?
Dili angay mahingawa sa inyong buot suroyon kay ania ra sa lalawigan sa Sugbo ang nindot nga lugar nga haom alang amping uban ang barkada o pamilya nga bugnaw sab ang temperatura.
ASA DAPIT?
Atong bisitaon ang “Bandera” sa Barangay Salamanca lungsod sa Ginatilan habagatang bahin sa lalawigan sa Sugbo nga nahimutang 135 kilometros kon manukad sa dakbayan sa Sugbo.
Ang naasoyng lugar haom nga campsite alang sa tanan gumikan sa talagsaon niining kabugnaw ug bagang panganod nga kanunay mohabol sa lugar.
Nahimutang kini 14 ka kilometros gikan sa town proper sa lungsod ug adunay gihabugon nga 1,840.5 feet above sea level.
Mao na kini ang usa sa pinakatumoy nga lugar sa lungsod.
Matod ni Barangay kapitan Conrado “Connie” Mabini, Salamanca nga sukad pa sa iyang pagkabata nailhan na ang maong dapit nga bugnaw.
Gawas nga permanente ang panganod sa paghabol sa lugar kanunay usab nga mag “yamog” (moist) ang lugar gumikan sa ka bugnaw.
Normal ra sa lugar ang gitawag ug “zero visibility” gumikan sa presensiya sa panganod nga diha sa duol.
BUGNAW
“Tugnaw kaayo na diha kanang gipangtugway nga mga mananap diha walay pasilong-silong kay walay init ug dili ka maanad magkurog gyud ka,” matod ni Mabini.
Gitawag kini ug “Bandera” gumikan kay ang unang mga katiguwangan nga mosaka sa lugar magbutang ug bandera (flag) inig abot sa tumoy.
Sa lugar makita ang view sa ubang silingang mga lungsod sa habagatang Sugbo sama sa Oslob ug ingon man ang probinsiya sa Negros Oriental.
Karon lang tuiga nakamatikod si Mabini nga adunay daghang manaka sa lugar aron mag camping sanglit moagi man sa ilang pinuy-anan ang mga sakyanan nga mosaka sa ibabaw nga nahimutang duha ka kilometos gikan sa naasoyng lugar.
FOR DEVELOPMENT
Usa kini sa nakapa-aghat ni Mabini sa pagkonsulta sa kagamhanan sa lungsod kung mahimo ba nga i-develop ang lugar isip usa ka eco-tourism site sa lungsod.
Dugang sa kapitan nga gimandoan siya ni Ginatilan Mayor Dean Michael Singco sa pagsusi kung dili ba pribado ang naasoyng lugar aron usab walay kakuli-an sa pag-develop unya niini.
Apan sa pagkakaron gipadayag sa kapitan nga wala pa usay miduol sa barangay nga nagpa-ilang tag-iya sa luna.
“Niingon ko nga mayor ato developon to kay daghan kaayong dili taga atoa nga adto mag camping mao ako sang klarohon kinsa na kay ang plano ug ma develop na ayohon ang karsada kay ang karsada pasaka gyud sa area wa pa ma-semento maayo abunohan kuno unya butangan sad ug entrance para ma maintain pud ba” matod ni Mabini.
UNSAON PAG-ADTO?
Dili problema ang pag adto sa lugar sanglit mahimo ra kining maadto sakay sa habal-habal diin P60 ang pleti pasaka gikan sa town proper ug P30 ang panaog.
Kung personal nga motorsiklo o pribadong sakyanan mahimo ra usab kini nga maabot sanglit semenatado man ang agianan paingon sa lugar.
Makasinati hinuon ka ug gamayng rough road apan ma-agian ra gihapon sa tanang klase sa sakyanan.
Duha ka klaseng luna sa dapit nga mahimo kang maka-camping.
Gawas sa pinakatumoy sa lugar diin nagbarog ang usa ka bungtod mahimo kang mag camping sa tiilan sa bungtod alang sa dili kaayo ganahan ug hilabihan ka tugnaw ug hilabihang panganod nga mobukot sa imong palibot.
Sa tiilan sa bungtod kasagaran iparada ang mga sakayanan ug motorsiklo, apan ang mga kusgan nga sakyanan (4WD) mahimo ra gayud nga makaabot sa pinakatumoy sa bungtod.
Pahimangno lang sa nagplanong moadto sa lugar sa pagdala gayud ug pagkaon ug mainom sanglit walay tindahan haduol sa lugar.
ANGAYANG DAD-ON
Mahitungod sa signal sa cellphone mag depende sa network ang signal sa lugar ug naglakip na niini ang sa internet. (Note: Globe ang kusog didto)
Kinahangalan kompleto ka usab ug flash light ug ubang sugang dagitabon kung mag overnight ug mas labaw jacket, coat, sweater ug uban pang sanina pagbatok sa bugnaw.
Wala hinuoy angay kabalak-an sa lugar sanglit luwas ra kini alang sa tanan.
“Okay raman diri wala may malditohon diri peaceful man ni amoa barangay unya wala may mga katingad-an tawo diha maong daghang mag camping gyud diha,” matod ni Mabini. /