GIPAHUNONG ni Ombudsman Samuel Martires ang mga lifestyle check sa mga opisyal sa gobyerno nga gikatahapang nangawat sa salapi sa mga magbubuhis, kay matod pa niya, “illogical” ang maong procedure.
Panahon na karon nga ipagawas sa mga kurakot nga opisyales sa gobyerno ang ilang mga tinaguang bahandi, mga “hidden and unexplained wealth,” kay wa nay mosusi kon ang ilang mga kabtangan ug salapi tugbang ba sa ilang kinitaan.
Usa ray akong nahibaw-an nga nahadlok sa lifestyle check – si anhing Senador Juan Flavier. Si Flavier, nga wa madato sa iyang hataas nga pag-alagad sa gobyerno, niingon nga nahadlok siya nga pinaagi sa lifestyle check mahibaw-an unya ang iyang “unexplained poverty.”
Ang lifestyle check anaa sa Republic Act No. 6713, ang Code of Conduct and Ethical Standards for Public Officials, nga nagmando nga “public officials and employees and their families shall lead modest lives appropriate to their positions and income” ug di mogara sa pagpakita sa ilang bahandi.
Sa yano nga pagkasulti, “living within your means,” kay kon “living beyond your means” na, piti ka sa lifestyle check. Pero dunay bilyako nga miingon, “live within your means, even if you have to borrow to do it.”
Si Martires, kanhi mahistrado sa Korte Suprema ug Sandiganbayan, miawhag sa Kongreso nga amendahan ang 31-anyos na nga balaod kay dunay mga probisyon niini nga way klaro, lakip sa lifestyle check sa mga opisyal ug kawani sa gobyerno.
Matod pa ni Martires, angay nga klaruhon kon unsa ang “simple living.” “We have to redefine what is living beyond your means. What is simple living to me may not be simple living to you or anyone,” matod pa niya.
Samtang si Justice Secretary Menardo Guevarra namahayag nga kon ang lifestyle check lang ang basihan, di kini paigo nga pruweba nga ang usa ka tawo nangawkaw o naghimo og kahiwian aron pagpadato sa iyang kaugalingon.
Pero kon dato na daan ang opisyal sa gobyerno, di na siya mangawat? Subay sa mga pagtuon didto sa Estados Unidos, hayan mas dako pa og kawaton ang dato kay sa pobre. Kon ang pobre mangawat og ginatos, ang dato minilyon.