ANG kahimtang sa katawhan maoy angay unahon pagsabot karong panahon sa pandemya. Daghang kaigsuonan nato nga naninguha aron makapalit og pagkaon sa nagkutoy nilang tiyan, apil sa ilang pamilya. Nagkalailain ang ilang kahinguhaan. Ang uban mamaligya sa aseras samtang ang uban magmaneho og PUJ, motorsiklo, tricycle ug uban pang legal nga panginabuhi.
Apan ang problema kay ang mga drayber sa PUJ dili pa makapamasahero tungod kay wa pa kunoy local government unit (LGU) nga nagkinahanglan kanila. Apan nahadlok ako nga hanap pa kaayo ang ilang kahigayunan kay anaa pa may daghang mga modernong jeep kun beep nga naghuwat nalang og permit aron sila makabiyahe. Kining pagsaad sa gobiyerno nga makabiyahe ra sila sa moabot nga mga adlaw mao ang paghatag kanila og sayop na paglaum kun false hope. Iligal pa usab ang pagpamasahero sa motor.
Ang mga sidewalk vendors usab halos wala nay dapit diin sila makapaninda human gihawanan sa gobiyerno ang mga aseras sa wa pa ang coronavirus aron mahamugaway ang kaagi-an sa mga tawo. Karong bag-o gipanakop sa mga tinugyanan sa Probe ang naninda sa mga aseras nga gidili. Nangadaut na hinuon ang ilang mga tinda tungod sa inilugay sa tag-iya ug mananakop.
Uyon man ko sa mga proyekto sa gobiyerno aron mahimong moderno ang atong transportasyon ug malimpiyo ang mga aseras apan kadtong standards nga gipatuman kanadto sa wa pa ang Covid-19 angayang untang lugakan og gamay karong panahuna aron atong mahatagan og higayon ang ma kabus nga dugay nang gigutom sa pagpangitag panginabuhi. Maayo man ang pagpanindut sa atong dapit apan mas gikinahanglang unahon ang pag-atiman sa kagutom sa mga kabus. Mobalik lang ta niana kon mobalik na ta sa normal. Mag-unsa man nang pagwapo apan nagkutoy ang tiyan sa katawhan? Maayo hinuon ang mga vendors sud sa sementeryo ug sepulturero kay iyang hatagan og tag-25 kilos nga bugas ug de lata.
Gipasanginlan ni Presidential spokesman Harry Roque si Land Transportation Office (LTO) – 7 Regional Director Victor Caindec og extortion. Una niini nagpasumbingay lamang si Roque apan sa dihang giangkon ni Caindec nga siya maoy gipasabut sa cabinet official, iya kining gipanghimakak. Ang LTO director higala ni Presidential Assistant for the Visayas Sec. Mike Dino ug Senador Bong Go apan nagduda ako kon mobabag ba sila kon makita nga sad-an kini.
Misaad si Roque nga iya kining ipaabot ngadto sa taas nga opisyal, murag iyang gipasabut nga iyang sultihan si Presidente Duterte kalabot niini. Atong huwaton kon unsa ang linugdangan niining tanan. Si kinsa man ang tuhoan sa Presidente, si Roque nga mipahibawo nga anaa siyay mga ebedensiya batok sa giingong pangilkil ni Caindec o ang report ba sa director batok sa iyang pasangil sa mga motorcycle distributors?
(mannyrabacal1144@gmail.com)