DUL-AN P1 bilyon ang na-puno sa assets sa kagamhanan sa lalawigan sa Sugbo.
Kini human nga nakuha niini ang 64-ektaryang luna sa Barangay Uling, dakbayan sa Naga.
Mao kini ang gipahibalo ni Atty. Roy Salubre, pangulo sa Provincial Treasurer’s Office.
“Fortunately within last month nakuha nato ang title so the property is now exclusively owned by the Cebu Provincial Government in fact duna nay title ato na ipakita,” matod ni Salubre.
Ang maong luna gingan ubos sa usa ka Leopolda Cecilo nga gi-auction sa lalawigan sa Sugbo sa 2007 gumikan kay wa kini makabayad sa P11 milyunes nga real property tax.
Gilugwayan sulod sa usa ka tuig sa lalawigan ang deadline nga makabayad kini apan napakyas sa pagbayad.
Tungod niini, napun-an ang resources sa probinsya nga magamit alang sa mga proyekto sa lalawigan.
Base sa financial statement sa Commission on Audit (COA) ang lalawigan sa Sugbo dunay total assets nga P34,528,151,645.89 sa 2018.
Sa pagbalik ni Cebu Gov. Gwendolyn Garcia sa pwesto sa 2019, mitubo ngadto sa P168,445,470,246.34 ang assets sa probinsya subay sa pag -re-appraise sa properties sa lalawigan.
Nalakip na niini ang pagbawi sa probinsya sa gipanag-iya nga luna sa Salinas Drive sa Barangay Lahug, Dakbayan sa Sugbo, access roads sa Cebu IT Park, pag-turnover sa ikaduhang edipisyo sa FLI- Cyberzone Cebu (FCC) ug uban pa.
Sugod Disyembre 31, 2019 moabot na sa P202 bilyones ang kinatibuk-ang asset sa lalawigan sa Sugbo.
Butang nga gikalipay usab sa gobernador diin gitataw nga kon mas dako nga bahandi sa probinsya, malambuon sab ang mga lungsod ug siyudad sa lalawigan.
Ang maong luna gikatakda nga tukuran sa Waste-to-Energy (WTE) nga proyekto. (ANV)