USA hitman sa New People’s Army (NPA) nga usa sa mga suspek nga nibanhig-patay sa kanhi hepe sa Guihulngan City Police Station sa Negros Oriental niadtong Hulyo 2017, nadakpan sa mga hinusang pwersa sa sundalo ug kapulisan niadtong Dominggo, Septiyembre 20, diin armas sa namatayng hepe nabawi human makuha sa posisyon sa dinakpan.
Ang nasikop mao si Adidas Acero, hingkod, ug nagpuyo sa Barangay Buenavista, siyudad sa Guihulngan ug gitumbok nga hitman sa NPA nga naglihok sa mga bukirang dapit sa isla sa Negros.
Nakuha pa gikan niya ang Glock 9mm pistol sa posisyon sa dinakpan ug sa dihang gipasusi ang serial number sa maong armas dinhi nasuta nga iyaha kini ni anhing Police Lieutenant Colonel Arnel Arpon.
Tungod sa maong armas nga nakuha, matod ni Police Brigadier General Albert Ignatius Ferro sa Police Regional Office (PRO) 7, nga usa si Acero sa mga ningbanhig sa hepe.
“We believe that this person is involved in the ambush of Police Lieutenant Colonel Arpon,” matod ni Ferro.
Dugang sa hepe sa PRO-7 nga tungod sa maong kalamboan, mahimong sulbad na ang kamatayon sa hepe ug laing upat ka sakop niini.
Si Acero gipaubos na sa imbestigasyon ug gipasakaan na usab og kaso. (AYB)