ANG Cebu City Government mo-release na sa allowances alang sa libuan ka mga scholar nga nagtungha sa nagkadaiyang kolehiyo ug unibersidad sa dakbayan sugod Oktubre 5 hangtod Oktubre 9, 2020.
Base sa record sa Cebu City Scholarship Committee, moabot sa 5,984 ka mga tinun-an sa tertiary level ang nalangan pagdawat sa ilang allowance gumikan sa Covid-19 pandemic nga unta adto rang Marso ihatag.
Si Mayor Edgardo Labella, subay sa pamahayag ni Cebu City Attorney Rey Gealon, nimando nga asikasuhon ang mga papelis aron di madugay mahatag na ang benepisyo sa scholars nga nanggraduwar sa high school sa mga public school.
Ang 5,984 ka mga estudyante makadawat og tag P1,000 isip school supply allowance alang sa 2nd semester sa 2019-2020. Ang mga tinun-an nga nagtungha sa mga state-run university adunay P2,500 para sa ilang book allowance o school supply.
Ang mga estudyante nga gikan sa bukirang barangay sa siyudad makadawat og P5,000 isip transportation allowance ug P1,000 para sa mga tinun-an nga taga urban areas. Ang Cebu City adunay dul-an 9,000 ka mga scholar ug sila gihatagan og tag P10,000 nga educational assistance matag semester.
Hinuon, 3,000 kanila nakadawat na sa assistance sa wa pa ang coronavirus pandemic.
Ang distribution sa allowances ipahigayon sa mga eskwelahan kon diin sila nagtungha sama sa University of Cebu (UC)main campus, Cebu Technological University(CTU) main campus, CTU-Bonbon, University of the Visayas (UV), Asian College of Technology-International Educational Foundation (ACTIEF), Cebu Normal University (CNU), Cebu City Medical Center (CCMC) College of Nursing ug Golden Success College. (PAC)