IDILI na sa Cebu City Transportation Office (CCTO) ang pagpaagi sa mga e-scooter sa mga national highway sa Dakbayan sa Sugbo.
Si Ronnie Nadera sa CCTO nagkanayon nga apil sa ilang dakpon ang mga scooter nga adunay makina nga ubos sa 50cc sanglit naghatag kini og peligro sa kadalanan.
Ang implementasyon sa CCTO ning pagdili sa duha ka mga matang sa scooters pinasubay sa Cebu City Traffic Code nga nagdili sa maong mga matang sa sakyanan sa kadalanan.
“Subay sa kamandu-an sa LTO nga ipadakop ang E-scooter ug katong adunay makina nga below 50cc nga gadagan sa kadalanan. Article 4 o Section 7 sa atong ordinansa sa Siyudad sa Sugbo nagdili sa maong mga sakyanan nga makadagan sa kadalanan sa Siyudad sa Sugbo,” tipik sa post sa official Facebook page sa CCTO.
“Among giawhag ang mga nanag-iya niini nga dili gamiton sa kadalanan sa syudad sa Sugbo,” dugang sa maong post.
Si Nadera nibutyag nga gipahibawo sila kagahapon ni Alma Barandog-Casimero, pangu sa CCTO, nga ipatuman sa Cebu City ang awhag sa Land Transportation Office (LTO)-7 kansang kamanduan nagagikan sa ilang Central Office. Ang post sa CCTO nakaani og lainlain nga reaksyon ug adunay uban nisaway sa maong lakang.
“Nganong ang sa Manila allowed ra sila, then dire lahi?...So unsa pangbuhaton namo aning amoa scoot, patulgon nga wala may memorandum nga pakuhaan ni og permit. If naa, tagai mi kay mang comply man mi, dili kay dire-diretso mos ing-ani nga paagi,” padayag ni Jc Boy Rabano Enerlas.
“Karong panahona nga ang tanan nangitag paagi nga dunay kasakyan siguro mas maayo irehistro lang sad ni sila para magamit gyud...” matod ni Erech Tan Malaay.
Si Cebu City Councilor Konsehal Joel Garganera, kinsa nanag-iya usab og e-scooter, niuyon sa lakang sa LTO, apan nihangyo nga luagan lang una ang implementasyon gumikan sa pandemia diin way igong public transport ug maglisod pagsakay ang mga tawo.
“It is untimely that this City will put limitations to people’s access to affordable, clean and environmentally friendly, social distancing alternative mode of transportation. Not this time of pandemic. We are the only city in the country that will be doing it,” text message ni Garganera sa Superbalita Cebu. Matod niya nga angay unang huwaton ang guidelines.
“There is no official or final guidelines yet on the use of electric e-scooters on public roads, its still being reviewed by DOTR Road Sector, Legal Affairs and the Office of the DOTR Secretary,” dugang sa konsehal.