GITUGOTAN sa Kagamhanan sa Dakbayan sa Talisay nga makabisita ang mga senior citizen ug minors sa mga sam-ang sa di pa Kalag-kalag ug gikatakda nga pagsirado sa mga sementeryo.
Mao kini ang lagda nga nalakip sa Executive Order No. 32- 2020 nga giluwatan ni Talisay City Mayor Gerald “Samsam” Gullas sa Septiyembre 23, 2020.
Ubos sa Section 5 sa EO, “senior citizens and minors shall be allowed entry in the cemeteries as age restrictions shall not apply during cemetery visits or in observance of Undas 2020.”
Gitugotan ang pagbisita sa mga sam-ang sa syudad sugod Oktubre 15 hangtod sa Oktubre 29.
Bisan pa niini, gikinahanglan gihapon nga mosubay sa health protocols sa syudad sama sa mandatory nga pag sul-ob og facemask, face shield ug uban pa nga protective equipment nga makapanagang sa kagaw sa coronavirus disease (Covid-19).
Limitado usab sa duha lang ka mga oras ang pagduaw ingon man ang gidaghanon sa mga tawo nga mahimong makasulod sa sementeryo sa usa ka higayon.
Ang Undas Task Force nga naglangkob sa kapulisan sa syudad maoy gitahasan sa pagmonitor sa mga sam-ang ingon man ang pagpatuman sa 30 porsyento nga kapasidad sa tawo nga makaduaw.
Gipaubos na sa modified general community quarantine (MGCQ) ang siyudad apan hugtanon nga gidili ang pagpahigayon og party kun panagtapok.
Lakip sa misanong ang Dakbayan sa Talisay sa pagpasira sa tanan nga sementeryo, colombariums, memorial parks pampubliko man o pribado sugod Oktubre 31 hangtod sa Nobiyembre 4.
Ang Inter-Agency Task Force for the Management of Emerging Infectious Disease (IATF-EID) miluwat og resolusyon No. 72 sa Septiyembre 17 nga ipasira ang mga sementeryo lukop nasud aron kalikayan ang pag tapok nga maoy usa sa hinungdan sa pagtakod sa sakit sa Covid-19.
Gipasidan-an ang tanan nga mosubay sa maong lagda. Ipahamtang ang tukmang silot sa mga mosupak sa kamandoan.
Subay sa uwahing datos sa dakbayan sa Talisay sa Septiyembre 23, moabot na sa 950 ang kompirmadong kaso sa Covid sa syudad. Hinuon, 821 na ang naka-recover ug 34 lang ang aktibong mga kaso apan 95 na ang nangamatay. (ANV)