MOKABAT sa 500 ka mga face shields gidonar sa Botin LPG alang sa mga sakop sa Task Force KasaLigan nga gipakatap sa Cebu City Police Office (CCPO) sa mga barangay sa Dakbayan sa Sugbo.
Ang mga sakop sa task force mao ang mamadlong ug manakop sa mga tawo nga di motuman sa mga health protocol.
Matod ni Police Colonel Josefino Ligan, officer-in-charge sa CCPO, nga dako na kaayo og ikatabang ang mga face shield sa mga sakop sa task force tungod kay mo roving sila sa mga barangay nga taas ang mga kaso sa coronavirus disease 2019 (Covid-19).
Sa miaging semana, ang task force gipatutok sa Barangay Apas human nisulbong ang kaso sa Covid sa maong dapit.
Apan sa dihang niubos na ang mga kaso sa Apas, ang Barangay Bacayan na usab ang gibalik-balikan sa task force aron mamadlong sa mga residente nga wa motuman sa minimum health standard.(AYB)