SUPERBALITA CEBU

Operasyon sa DMC, PMSC gipahunong ni Cimatu

■ INSPEKSYON: Si Department of Environment and Natural Resources (DENR) Secretary Roy Cimatu (wala) ug Mines and Geosciences Bureau 7 officer-in-charge Armando Malicse (tuo) misusi sa conveyor belt sa gipulpog nga dolomite sud sa planta sa Philippine Mining Service Corp. sa Barangay Pugalo, lungsod sa Alcoy sa Biyernes, Septiyembre 25, 2020. / ALEX BADAYOS

TEMPORARYONG gipahunong ang tanang mga operasyon sa Dolomite Mining Corporation ug sa sister-company niini nga Philippine Mining Service Corporation apil na ang pag-export sugod sa Biyernes, Septiyembre 25, 2020.

Kini ang gitug-an ni Department of Environment and Natural Resources (DENR Secretary Roy Cimatu sa mga tigbalita atol sa iyang pagduaw sa lungsod sa Alcoy, sa probinsya sa Sugbo sa Biyernes sa buntag.

Si Cimatu kinsa niabot sa Sugbo, Huwebes sa hapon, niadto sa lugar, Biyernes sa buntag uban ang kadagkuan sa DENR-7, Environmental Management Bureau (EMB-7) ug Mines and Geosciences Bureau (MGB-7) aron makita ang lugar ug pakigtagbuan ang kadagkuan sa kompaniya.

Aron sa iyang masabtan ang operasyon gikan sa mining operation sa DMC hangtod na sa pagproseso sa dolomite ug pag-transport niini agi sa ilang shipyard sa PMSC, atbang ra usab sa DMC, nakigtagbo siya sa kadagkuan sa duha ka nga kompaniya.

Giangkon sa kalihim nga siya natagbaw sa gipasabot ilabi na sa mining, apan iyang giangkon nga concern siya sa environmental impact ilabi na sa pagbalhin sa mga processed dolomite ngadto sa barkong mokarga niini, ilabi na kon adunay mangahulog nga mga dolomite sa dagat. Kini iyang gitug-an atol sa iyang pagsusi sa shipyard.

Gimanduan niya ang kadagkuan sa EMB 7 sa pagsusi sa air ug water quality sa lugar ug pagpadala og mga diver sa lugar aron pagsusi kon aduna bay mga coral nga nadaot.

Atol sa pagsusi, walay operasyon ang PMSC.

“I have to stop the operation to conduct an investigation, if may violation, we have to suspend the company,” saysay ni Cimatu.

Usa ka ekipo nga high volume air and water sampler ang gipahimutang dayon sa lugar pagsuta sa kalidad sa hangin ug tubigi. Hinuon, gitug-an ni Antonio Castillo, senior manager sa corporate planning sa PMSC nga andam sila mosunod sa kamanduan ni Cimatu.

“Ila order sa amo di ta kasupak nila kay sila man ang regulating body,” matod ni Castillo sa mga tigbalita.

Ang pagpabalik sa operasyon magdepende kon unsay resulta ug kon kunus-a mogawas ang rekomendasyon sa pagsusi.

Kabahin sa taxation issue sa kompaniya ug sa Provincial Government, matod ni Cimatu nga ipasubay usab niya sa legal department sa MGB 7, apan ang ordinansa iyang giangkon nga walay labot ang mining law niana ug katungod sa gobyerno ang pag-tax.

APEKTADO

Samtang alang sa mga lumolupyo sa Barangay Pugalo nahimutang ang DMC ug PMC, ang mga social obligation sa kompaniya dakong nakatabang kanila.

Gani matud sa kanhi kapitan sud sa 11 ka tuig nga si Maximo Catulpos, kinsa yano na karon nga molupyo sa barangay,mokita ang ilang dapit og pinakagamay na nga P1.3 milyones kada tuig.

Di moubos sa P800,000 sa real property tax kada tuig ug di usab momenus sa P500,000 ang ihatag gikan sa national wealth, kabahin sa excise tax sa maong mga kompaniya.

Libre usab sila sa mga sand and gravel alang sa mga infrastructure project ug usahay, bisan ang kwarta bayad para sa labor.

Way problema sa kuha sa mga isda ug mga kinhason sa lugar nga duol sa ship loading area, gitug-an sa asawa sa usa sa mga mananagat sa Pugalo, kansang pagpangisda ang gisaligan.

Ug giingon nga ang maong mga kompaniya dako og natabang kanila panahon sa gipaubos sa lockdown tungod sa pandemya.

“Tanang mga proyekto counterparted nila, cash or labor ug libre mi sa sand and gravel para sa infrastructure project. Duna sad silay gihatag sa ubang barangay, ang tibuok Alcoy and even Dalaguete,” gitug-an ni Catulpos.

SALAMAT

Samtang, nagpasalamat si Cebu Governor Gwendolyn Garcia sa hinanali nga pagtubag ni Cimatu kalabot sa pagsusi sa lungsod sa posibleng mga kalapasan niini.

“I thank Secretary Cimatu for acting quickly. He has I’m sure already been apprised of the investigation that we had conducted and from the reports that have arrived and been discussed yesterday from the different agencies, from the EMB to the MGB, the Penro that conducted the site inspection. There are obvious violation to the ECC and the water discharge permit, these are violations that are causing degradation of our seabed. So, we had contemplated on issuing cease and desist orders. But, I thank Secretary Cimatu for beating me to it. So, daghang salamat Secretary Cimatu,” matod ni Garcia.

Ang mayor sa Alcoy, Michael Sestoso, mopatawag usab og pulongpulong aron hisgutan kon unsay ikatabang sa lungsod sa mga posibleng maapektahan sa temporary suspension.

Gidawat hinuon ni Sestoso ang desisyon ni Cimatu pagpahigayon og imbestigasyon sa lungsod.(ANV)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph