PATAY ang usa ka Auxiliary Service Worker sa Davao City dihang nagpakamatay kini sud sa banyo duol sa barangay hall samtang siya gipa-barangay sa usa ka public school teacher gumikan giingong nakautang ug wa na kabayad.
Sa impormasyon, nasayran nga alas 3 sa hapon niadtong Huwebes, Septyembre 24, 2020, ang biktima nga taga Barangay Malamba, Marilog District ang nananghid nga mogamit sa kasilyas atol sa ilang hearing sa barangay.
Natingala na lang ang kagawad nga mihusay kay wala na mibalik ang biktima hinungdan nga ila kining gisubay ug nadiskubrehan nga patay na kini sud sa kasilyas nga nagbitay.
Halos gimahay sa netizens ang maestra nga mipa-barangay sa biktima nga maoy nahimong mga komento human kini ma-post sa Facebook page sa Superbalita Davao kagahapon sa buntag.
Mga netizens nagsulti nga dalhon suma pa sa maestra ang konsensya sa tibuok niyang kinabuhi, naa sab nagsulti nga walay kasingkasing ang maestra nga midemanda kay bisan ania sa pandemya wala misabot sa sitwasiyon.
Samtang daghan sab ang midapig sa maestra ug namahayag nga kon dili kabalo mobayad, dili na lang unta mangutang.
Naa sab nagpaabot og kasubo sa kamatayon sa biktima ug nagtambag sa uban nga dili angay mabalaka sa utang gumikan mabayaran pa kini kung buhi lamang ang nangutang.
Sa pagkakaron, padayong ginasubay sa kapulisan sa Marilog Police Station kon duna ba'y foul play ang kamatayon sa nahisgutan.
***
Kon ikaw nakasinati og kamingaw sa kinabuhi o depression, o ganahan og naay makaesturya, mamahimong motawas sa HopeLine Hotlines (02) 804-HOPE (4673); 0917 558 HOPE (4673); ug 2919 (toll-free number for all GLOBE and TM subscribers).