MAGTUTUDLO nga nanumod og shabu ang napatay human misukol sa mga awtoridad atol sa anti-drug operation alas 5:40 sa hapon niadtong Huwebes, Septyembre 24 sa Midsayap, North Cotabato.
Giila ang napatay nga si Jake Largo Placibe alyas Jekjek, 23, licensed professional teacher (LPT) ug nagpuyo sa Zone II, Barangay Cabaruyan, Libungan sa nahisgutang probinsiya.
Sumala kang Midsayap Chief of Police Lieutenant Colonel John Miridel Calinga nga nagpahigayon sila og drug buy-bust uban ang mga sakop sa Philippine Drug Enforcement Agency (PDEA)-Soccsksargen sa Purok Orchids, Brgy. Poblacion 8, Midsayap.
Apan nakabantay si Placibe nga mga pulis ug PDEA ang iyang katransaksiyon hinungdan nga mibunot siya sa dala niining armas ug nakigpinusilay.
Napugos ang mga awtoridad nga pusilon ang magtutudlo resulta nga nakaangkon siya og upat ka samad sa iyang lawas.
Nadala pa ngadto sa Dr. Amado Diaz Provincial Foundation Hospital sa Midsayap si Placibe apan namatay.
Narekober sa posisyon sa suspek ang iyang pusil, shabu ug marked money.
Nanawagan ang Midsayap Municipal Police Station ug PDEA-Soccsksargen sa mga nagpayuhot og gidiling druga nga magbag-o na sa kinabuhi samtang dili pa ulahi ang tanan.