SEGURADO na ang pagbalik sa aksyon sa Philippine Basketball Association (PBA) 45th season taliwala sa padayong hulga sa coronavirus 2019 (Covid-19) human kini gitugtan sa Inter-Agency Task Force on Emerging and Infectious Disease (IATF).
Ang IATF ming-uyon sa gipasa sa PBA nga mga detalye kabahin sa ilang pagbalik pinasubay sa “bubble” setup sama sa gibuhat sa National Basketball Association (NBA).
Hasta ang 5-on-5 training ug uban pang hangyo sa PBA gitugtan sa IATF.
“Pinayagan na ang scrimmages, pinayagan na ang games. Tuloy-tuloy na, dere-derecho na,” matod ni PBA commissioner Willie Marcial nga napatik sa www.pba.ph.
Nagkanayon si IATF Deputy Chief Implementer Vince Dizon nga ang tanang mga kalihukan sa pagbalik sa PBA kinahanglang ipahigayon sulod sa bubble.
Ang PBA bubble gikatakdang sugdan karong Oktubre 11, 2020 sa Clark, Pampanga.
Hinuon gitataw ni Dizon nga ang temporaryo pa ang ilang gihatag nga pagtugot gumikan kay ang health protocols sa Joint Administrative Order (JAO) kabahin sa paugnat sa kusog kinahanglang mahisubay sa mas estriktong health protocols sa PBA.
“Yung kasing mga protocols doon sa JAO at protocols sa PBA bubble, mas istrikto ‘yung PBA protocols kesa protocol sa JAO. Kailangan lang amyendahin ‘yung protocols na yun,” pasabot ni Dizon.
“Since mas strict ‘yung sa PBA, may authority na ang PBA na mag-begin. Kailangan i-adjust ‘yung agreement (JAO) para mag-reflect ‘yung sa PBA Bubble.”
Ang PBA mipili sa Clark nga pahigayunan sa bubble gumikan sa mga pasilidad niini diin nag-alirong ang basketball courts, hotels, ug hospitals.
Naa sab kini golf courses, swimming pools, ug game rooms nga mahimong kalingawan sa mga magduduwa aron pawagtang sa kalaay.
“Masaya kami kasi we can bring back basketball. We were able to find ways to bring it back,” matod ni PBA board chairman Ricky Vargas. (ESL)