ANG delicadeza dili na balaod. Naa ra gyud ni sa tawo. Usa ka Spanish term ning delicadeza diin ang buot ipasabot sa ininglis ‘sense of propriety’. Kana bang magbaton og ka-ikog o ka-uwaw ba kaha. Kana bang dili magpabaga sa nawong ug siya na lay ma-uwaw kon iyang ipadayon ang paghimo sa usa ka butang nga dili angay himuon kay usa ka dakong sayop o salawayon nga buhat. Kon ang tanang tawo magbaton og delicadeza, siguro minus ang mga kontrobersiya nga motumaw o mahitabo.
Sama anang nahitabo karon tali ni Lapu-Lapu City Mayor Junard ‘Ahong’ Chan ug Congresswoman Paz Radaza kabahin sa isyo sa buhatan sa congresswoman nga anaa sulod sa Lapu-Lapu City Hall. Gustong papahawaon ni Mayor Chan si Kong. Radaza apan nagdumili ang naulahi gumikan kay diha na ang maong buhatan nga gi-ukupahan ni Congresswoman Aileen Radaza, anak ni Paz. Okey lang to kaniadto kay anak man ni Paz si Aillen.
Apan karon lahi naman. Si Chan naman ang mayor ug siya na ang magbuot diha sa City Hall. Nagdumili si Radaza sa pagpahawa gumikan kay covered kini og ordinance. Napatik sa maong ordinansa nga ‘anha mag-opisina ang kongresista sa City Hall ug libre kini sa koryente, tubig ug communication billings. Apan ang maong ordinansa napasar niadto lang Hunyo 6, diin humana ang eleksiyon ug midaug na si Chan.
Mismo ang secretary sa Sangguniang Panlungsod nagkanayon nga wala mapublikar sa lokal nga pamantalaan ang maong ordinansa sa dihang na-approve kini. Wala usab mag-agi sa first and second reading. Bout ipasabot nga gidispuga ang pagpasar sa maong ordinansa aron lang gyud nga adunay igong sukaranan si Paz nga dili mapahawa sa maong buhatan.
Bisan si Sec. Eduardo Año sa DILG nagkanayon nga illegal ang maong ordinansa ug mipahimangno ni Radaza nga dili mamugos. Aw, kon nakasabot ug adunay delicadeza si Radaza, maminaw unta siya ni Sec. Año ug dili ipamugos ang iyang personal nga interes kay dakong sayop. Maayo unta og maminaw si Paz sa pahimangno ni Sec. Año. (bobbygnalzaro@gmail.com)