KON ikaw usa ka online seller, ayaw og kompyansa sa imong kustomer. Seguroa nga di ka mabiktima sa magpakaaron ingnon nga mopalit apan duna diay dautang plano.
Usa ka 23 anyos nga lalake nadakpan sa mga pulis sa Dakbayan sa Talisay sa usa ka hot pursuit niadtong Huwebes sa hapon, Septiyembre 24, 2020 sa Barangay San Isidro, Dakbayan sa Talisay human niya gidagan ang cell phone gikan sa babayeng online seller nga iyang gibiktima.
Matod ni Police Major Gerard Ace Pelare, hepe sa Talisay City Police Station, ang suspek nga giilang si Redjie Kyle Barquero, taga Barangay Dumlog, ilang gisikop human gireklamo sa usa ka Jennifer Cantiveros, hingkud, negusyante sa online.
Matod ni Cantiveros nga si Barquero ni-order kaniya og mahalon nga cell phone balor og P25,000.
Sila si Barquero ug Cantiveros nakasabot nga magkita sila sa usa ka dapit sa Barangay San Isidro sa mao nga siyudad sa Huwebes sa di pa tingpaniudto. Niabot sa dapit ug oras si Cantiveros ug dayon nisunod si Barquero.
Gitan-aw ni Barquero ang cell phone, apan kalit kining nidagan dala ang butang.
Nakapangayog tabang si Cantiveros sa Talisay Police ug nianang mga alas 4 sa hapon, nadakpan si Barquero nga giila sa negusyante nga maoy ni order online.
Si Barquero kasamtangang gipriso sa Talisay City Police Station ug gitakda nga pasakaan og kaso nga pagpangawat.(BBT)