DUL-AN sa P4 milyones nga balor sa ilegal nga drugas ang nasakmit sa kapulisan sa buy bust sa Dakbayan sa Sugbo, Huwebes, Septiyembre 24, 2020.
Unang nadakpan si Marcos Leonardo, alyas Ambo, 42, taga Barangay Lawaan 1, Dakbayan sa Talisay.
Si Police Major John Kareen Escober, hepe sa Pardo Police Station, maoy nangu sa buy bust pasado alas 2 sa hapon sa Huwebes.
Matod ni Escober nga si Leonardo nasakmitan og drugas nga moabot na sa kapin sa tunga sa kilo 575 gramos nga mobalor og labing minos P3.8 milyunes.
Dugang ni Escober nga si Leonardo gikonsiderar nga high value individual sa regional level sa Police Regional Office (PRO 7 tungod sa mga nasakmit niini nga drugas.
Moabot sa usa ka buwan ang pag monitor sa Pardo police hangtod nga nakompirma nga pundohanan usab si Leonardo sa illegal drugs.
Wa pa mahibaw-i diin gikan ang drugas ni Leonardo.
Samtang duha ka mga lalake ug usa ka babaye nadakpan pasado alas 11 sa gabii sa JM Basa, Barangay Sawang Calero ning siyudad.
Si Police Major Eduard Sanchez sa Sawang Calero Police Station Maoy nangu sa buy bust nga niresulta sa pagkadakop sa tulo.
Ang mga dinakpan giila nga sila si Jeril Labnotin, 31, taga Sityo Lawis, Barangay Mambaling, traysikad drayber; Ramy Insela,50, taga Barangay Inayawan,lechonero ug si Geraldine Sanchez, 19.
Nasakmit gikan kanila ang illegal drugs nga balor og P36,000. Mga kasong paghupot og illegal drugs ang giandam sa kapulisan batok kanila.
Samtang sa Consolacion, tulo ka gikatahapang big-time drug pushers nasikop sa buy bust sa Huwebes sa alas 9:10 sa gabii sa Brgy Danlag.
Mga nasikop giilang sila si Joserena Andreno, hingkod, taga Brgy. Panoypoy, Consolacion; Kent Mark Medado, 27, taga Brgy. Poblacion; ug Bamby Gasal, 42.
Si Police Lt. Colonel Randi Korret, hepe sa Provincial Intelligence Unit (PIU) sa Cebu Police Provincial Office (CPPO) nagkanayon nga ang naka-eskapo ang ilang target nga si John Kherry Balaba,kinsa kalit nga nahanaw.
Nakuha sa possession sa mga dinakpan ang usa ka medium, usa ka large nga putos sa shabu, ug upat ka gagmay. Ang drugas motimbang og 28 gramos nga mobalor og P190, 400. / BBT, (GPL)