Grabing pagsulbong sa negosyo pinaagi sa on line sukad nga gipatuman ang daghang health protocol mugna sa makamatay nga virus. Diha naman ning maong matang sa patigayon sa wala pa ang lockdown.
Akong silingan kaniadto nga nagtrabaho isip call center agent, way laing madali dali kong bation na og kagutom. Delivery sa iyang paboritong pagkaon pinaagi sa online ang ihatod sa iyang pinuy-anan. Kini nga paagi sa negosyo nakit-an na nako ni bisan niadtong panahon sa wala pa maimbento ang computer ug wala pa sab ang internet connection.
Pananglitan ang pagpanuroy og isda diha sa mga sityo ug ubang baligyaonon sama sa taho, ice drop ug ubang pagkaon, nahimo na nga tinubdan sa panginabuhian sa karaang panahon hangtod karon. Wa pay naghisgot kaniadto og internet connection apan diha na ni sila naglibod sa ilang mga paninda. Mao ni nahitabo kaniadto sa usa ka taga Batangas.
Sigon sa asoy sa usa ka Edmundo Aguila, ang iyang Lolo Dionosio nga taga Ibaan, Batangas naabot dinhi sa Sugbo pagpanuroy og habol, moskitero ug ubang paninda nga iyang dala gikan sa kaulohan. Wa magdugay nakahukom si Lolo Dionisio nga mamalhin og puyo dinhi sa ato.
Sa 21 niya ka anak kadaghanan niini sa Batangas natawo usa na si Edmundo nga karon nagpanuigon og 43 anyos.
Sa paglabay sa katuigan lahi na ang panginabuhian nga ilang nasudlan. Kauban ang iyang papa Dante ug lima ka igsoon, pagbaid og nipper, nail cutter ug ubang gamit sa paglimpiyo sa koko, tiil ug kamot maoy ilang pangita.
Diha sa aseras sa dalan Osmeña Blvd. eskina Colon sila moplastar matag adlaw nga tanan. Naka kita namo ani nila niadtong panahon sa wala pa ang Covid-19. Si Edmundo, mao na ang tigbaid atubangan sa karaang senihan nga Cinerama nga karon usa na ka dakong tindahan. Magtindak na siya sa bisiklita nga gidesinyo nga maoy mopatuyok sa bairan nga gimuntar.
Tungod sa kampanya paghawan sa mga aseras pun-an pa sa lockdown nahanaw daw aso ang mga manindahay apil na si Edmundo. Sa niaging adlaw nagkita mi sa usa ka hilit nga dapit.
“Padayon gihapon ko pero kinahanglang molibot gamit ang bisiklita pagpangita og kustomer, para mabuhi.” asoy ni Edmundo nga taga sityo All Season, Barangay Cogon Pardo, Cebu City.
Sa ato pa, inay magpaabot og kustomer sa aseras, karon kinahanglan ni Edmundo nga magpasingot pagtinindak sa iyang bisiklita pagpangita og kustomer.
Mokita man tuod pero layo ra ni sa iyang kinitaan sa aseras sa wala pa ang pandemiya sa coronavirus disease 2019 (Covid-19). Puno sa iyang abilidad mao ang pagbaid sa inyong mga kutsilyo, sundang ug gabas.