GILUNGKAB sa wala pa mailhing kawatan ang buhatan sa City Social Welfare Service (CSWS) sa dakbayan sa Lapu-Lapu kagahapon, Septiyembre 25.
Ang gilungkab mao ang usa ka lawak nga nahimutang sa ikaduhang andana sa naasoyng buhatan.
Duha ka laptop nga nagkantidad ug P45,000, usa ka netbook nga nagkantidad og P13,000.00, duha ka keypads sa scellphone nga nagkantidad og P1,2000 ug salaping P1,020 ang nakuha.
Matod ni Police Captain Aibert Jay Samson, hepe sa Pusok Police Station sa Lapu-Lapu City Police Office (LCPO), nga giguba ang pultahan sa buhatan bisan ug nakandado unta kini.
Giguba usab sa suspetsado ang laing pultahan nga sumpay sa rampa sa likod nga bahin sa ilang buhatan nga wala na unta gamita sa pagkakaron gumikan sa coronavirus disease 2019 (Covid-19).
Ang mga empleyado na sa buhatan ang nakamatikod niini dihang padulong na silang moduty sa buntag sa Septyembre 25.
Dako ang posibilidad sumala ni Samson nga gabie o kadlawon gilungkab ang naasoyng buhatan aron walay makakita sa ilang dautang buhat.
Gisuwayan pa karon sa kapulisan pagsusi kun ugaling aduna bay closed circuit television (CCTV) sa buhatan o kasikbit niini nga posibleng nakakuha sa pagpanglungkab.
Ang naasoyng buhatan wala sulod sa main building sa Lapu-Lapu City Hall sanglit nabuwag kini ug building kilid sa city hall.
Posibling gipanid-an sa kawatan ang naasoyng buhatan sa pagtuo nga mimgaw kini panahon sa kagabhion. (GCM)