IPATUMAN na unya sa dakbayan sa Mandaue ang ilang comprehensive bike ordinance human kini gipasar sa unang pagbasa.
Gipalabang sa konseho sa unang pagbasa sa ika-63 nga regular session niadtong Miyerkules, Septiyembre 23, 2020 diin giduso kini ngadto sa committee on laws.
Matod ni Mandaue City Councilor Jimmy Lumapas, ang misuwat sa maong ordinansa ug ang nangulo sa Committee on Transportation, nga naumol ang maong ordinansa alang sa kaluwasan ug seguridad ngadto sa mga magbisikleta, labi na nga usa na kini ka alternatibo nga transportasyon.
Miangkon si Lumapas nga ang Mandaue ang labing una sa Metro Cebu nga nakaumol na og ordinansa alang sa paggamit sa bisikleta.
Apan nasayran sa Superbalita Cebu nga nakapasar na og susamang ordinansa bahin sa agianan sa bisikleta ang dakbayan sa Sugbo nga hinahinay nga gipatuman karon.
Niadtong Hunyo, gibutangan na ang pipila ka mga dalan sa Mandaue ug bike lanes nga naglapdon og four feet o 1.2 metros.
Nagplano sab ang dakbayan pinaagi sa maong ordinansa nga pabutangan ang mga bike lanes og plastic barriers labi na sa highway, sigon ni Lumapas.
Anaa sa maong ordinansa ang mga sumbanan nga kinahanglan sundon sa mga magbisikleta.
Sama sa, pagsul-ob og helmet, reflectorized vest, blinker, anaay break, pagsubay sa bike lane, pag-counterflow ug uban pa.
Ang mga makalapas sa maong sumabanan alang sa defensive sama sa walay helmet, blinker, reflectorized vest, makabayad og P50.
Alang sa offensive sama sa pag-counterflow, overloading, walay break, nagpa-angkas ug dili musubay sa bike lanes, makamulta og P100.
Ang dili makabayad kinahanglan nga muhatag og usa ka oras nga community service sa Traffic Enforcement Agency of Mandaue (Team).
Kung ugaling madisgrasya ang bisikleta o ang tag-iya sa bisikleta nakainom o sa tan-aw sa Team enforcer nga dili kini makakontrolar sa pisikal ug mental nga aspeto, ikompiskar o ipa-impound ang bisikleta.
Aplikado ang towing fee ug storage fee alang mga bisikleta nga makompiskar o ma-impound subay sa Public Towing and Impounding Ordinance.
Ang mupatuman sa maong mga sumbanan mao ang mga kawani sa Team ug ang mga multa adto bayaran sa City Treasurer’s Office o sa Team office.
Giawhag sa maong ordinansa ang tanang establishemento pampubliko o pribado maghatag singko porsyento ngadto sa 10 porsyento nga lugar sa kinatibuk-ang parking lot sa establisemento alang sa pag-instalar og bicycle racks.
Kung walay parkinganan ang estbalishemento, giawhag gihapon kini nga magbutang ug usa lang ka bicycle rack.
Giawhag sab ang mga establishemento nga magbutang og bike repair station.
Nanghinaot si Lumapas nga sa ubang mga kasikbit nga lokal nga gobyerno nga mag-umol sab ug bike ordinance aron adunay continuity sa ilang ordinansa.
Ang bike ordinance kinahangkan pa nga muagi sa Committee on Laws human niini ipaagi pa kini og public hearing ug mag-imbitar sila og grupo sa bicyclists kung igo na ba kining maong ordinansa una iduso sa ikaduha ug katapusang pagbasa ug pirmahan sa mayor sa paghingpit sa balaud.(KFD)