Truckboy sa usa ka wing van namatay diha-diha human madat-ugi sa ilang sakyanan nga nalimbuwad Biyernes sa alas 6:30 sa gabii, Septiyembre 25, 2020 sa Sitio Sta. Cruz Barangay Poblacion, lungsod sa Alcoy, habagatang Sugbo.
Ang biktima nga nagtinguha sa paglikay sa disgrasya pinaagi sa pag-ambak gikan sa trak, apan namatay na hinuon, giilang si Jobert Berongan, 38, minyo, taga Brgy. Lahug, dakbayan sa Sugbo.
Si Berongan napasok sa ilawom sa wing van nga Fuzo fighter truck (GKG- 993) nga gimaniho ni Jimar Ireneo, 30, dunay kapuyo, taga Brgy. Tapon, lungsod sa Dumanjug.
Sa pagkalimbuwad sa wing van, nidaro kini sa usa ka Toyota Fortuner (AFA 2587) nga gimaniho ni Maribel Jane Stewart, 38, minyo, taga Brgy. Atabay, Alcoy.
Sila si Ireneo ug Stewart nakaangkon lang gagmay nga mga samad ug nangalipong tungod sa kakusog sa impact.
Ang wing van gipanag-iya ni Roque Duke Lim, sa Negros Occidental nga nanag-iya sa Olympic J.A. General Merchandise, nga dunay tindahan sa lungsod sa Dalaguete.
Si Master Sergeant Allan Sanoy, sa Alcoy Police Station nga nahinabi sa Superbalita Cebu nagkanayon nga ang wing van gikan sa Brgy. Nug-as, bukiran sa Alcoy.
Duna ni karga nga bugas ug feeds nga gibaligya nila sa tabo niadtong Biyernes.
Si Ireneo niasoy kang Sanoy nga nagdulhog sila sa kurbadahon nga karsada sa barangay road sa dihang nawad-an siyag kontrol sa manobela human napalyar ang brake sa wing van.
Iyang gimaniubra ang wing van aron di matagak sa bung-aw hinungdan nga niharos paingon sa ubos ug naligid sa karsada.
Gikasugat nga nagsubida ang Toyota Fortuner nga gimaneho ni Stewart.
Si Stewart nga nakalitan sa nag-ikis-ikis nga wing van nga nagdulhog, kalit siyang mihunong aron unta makalikay, apan naigo ang atubangan sa iyang sakyanan sa trak nga gikasugat.
Si Berongan naratol, nahadlok nga mahagbong sa bung-aw ang wing van.
Siya niambak apan gidimalas kay maoy pagkatumba sa wing van ug sa tunga siya napasok ug napiit.
“Hadlok na daw kaayo ang truckboy nga matagak sila sa bung-aw pero, gidimalas sa iyang pag ambak kay nadat-ugan. Unya naguroy pipila ka metros maong napisat,” dugang ni Sanoy.
Sumala pa ni Sanoy, nga posibling nagduka kay lapoy ang driver, nagdali nga makapauli, kusog nga nagdulhog hinungdan nga wa mokupot ang brake.
Si Ireneo gitanggong sa Alcoy Police Station tungod sa kamatayon ni Berongan ug kadaut sa sakyanan ni Stewart.
Huwaton sa kapulisan unsay hukom sa pamilya ni Berongan, pasakaan ba og kaso o di.