GIANUNSYO ni retired mix martial arts star Conor McGregor nga magsangka sila ni Filipino senator ug boxing icon Manny Pacquiao didto sa Middle East.
Kini base post sa Twitter account sa Irishman kinsa kanhi champion sa featherweight ug lightweight sa UFC nga nagkanayon “I’m boxing Manny Pacquiao next in the Middle East” kagahapon, Septiyembre 26, 2020.
Apan matod ni Audie Attar, ang manager ni McGregor base sa interview sa ESPN nga dili pa done deal ang maong binukbokay tali sa Irishman ug Filipino star apan iyang gibutyag nga posible kining mahitabo karong Disyembre o January, 2021.
Si McGregor nilampos pagduwa sa boksing niadtong 2017 apan gidabodabohan, gimakmak ug gi-TKO ra siya sa 10th round ni retired boxing star Floyd Mayweather atol sa ilang non title bout didto sa Las Vegas diin nikita og $55 million dollars sa gate attendance ug niabot og 4.3 million pay-per-view buys.
Apan ang maong resulta wala kini makapalaos ni Conor kinsa nipunteriya karon sa iyang ambisyon pagpakigsumbagay sa 40 anyos nga Filipino senator kinsa niadtong Pebrero nipirma og deal sa Paradigm Sports Management nga mao sab ang nagdumala sa Irishman.
“It will be a true honour to have faced two of the greatest boxers of the modern era,” paghagway ni McGregor.
Si Pacquiao, sa iyang bahin, wala pay opisyal nga tubag sa mga patotsada sa kanhi UFC star apan una ra kining nipadayag nga dili siya moatras ni bisan kinsa basta adto lang sila mag-abot sa welterweight kansang timbang dili molapas sa 147 libras. (PAC)