NALIPAY ko sa akong pagkahibawo nga gisugdan na diay ang pagpamintal sa mga karsada nga lagbasan sa bike lane dinhi sa Dakbayan sa Sugbo. Naa sa dan V. Rama ang unang gipintalan nga bike lane. Di ra ba ordinaryo lang nga pagpintal kay di lang badlis ang gibutang, tibuok lane gipintalan.
Ang nakanindot sa Cebu City kay duna ni ordinansa nga napasar niadtong 2014, apan wa ma realize ang bike lane tungod sa pulitika. Wa pa man gud nila makita ang kadaghanon sa mga tawo nga nag bike. Karon nga daghan na, di na nila malikayan.
Dunay mga phases ang bike lanes. Ang una mao ang center phase nga naa sa kinapusoran sa siyudad. Molagbas kini sa Barangay Labangon, Sityo Banawa, Fuente Osmeña, General Maxllom Avenue, Cebu Business Park, Barangay Mabolo, New Imus Road, MJ Cuenco Avenue ug Barangay Santo Niño.
Dayon sundan kini sa Barangay Lahug, Barangay Talamban ug katapusan N. Bacalso Avenue.
Ila kining gipahaum sa mga rota sa umaabot nga Bus Rapid Transit. Kaniadto, nasabutan nga ang folding bikes mahimo rang makarga sa mga bus kay sa Manila, giuyonan ang proposal sa Tiklop Society of the Philippines, grupo sa folding bikers, nga madala sulod sa LRT ang mga biseklita basta mapilo lang.
Hinaut pa nga mao usab ni ang buhaton dinhi sa Sugbo.
ORDINANSA
Importante kaayo ang ordinansa sa biseklita. Mao ni ang among giduso ug napanday ang ordinansa nga dunay inputs gikan namong mga bike enthusiast nga nagagikan sa lainlaing hut-ong sa pribadong sektor. Naay mga probisyon nga nagagikan namo.
Ang makapaguol lang kay nilabay una ang unom ka tuig una pa natuman ang among damgo nga bike lanes. Sagdi lang, at least, naa na ang bike lanes nga mahimong legacy sa pamunoan ni Mayor Edgardo Labella.
Duha ka mga administrasyon ang nangagi, kang Bise Mayor Michael Rama ug kanhi mayor Tomas Osmeña nga wa ni matuman. Ingon sa giyak-an lang.
MANDAUE
Ang Mandaue mopalabang usab og ordinansahon alang sa biseklita. Mas maayo kon ilang tun-an usab ang ordinansa sa Cebu City. Daghan sila og mapupo sa ordinansa sa siyudad kay daghan ang input ani nga gikan sa bikers.
Hinaut pa nga ang mga siyudad sa Metro Cebu maghiusa sa pagbutang og bike lanes. Mao ni ang future, sama sa nahitabo industriyalisado ug adunahang mga nasod.