Binasi sa Ezekiel 18:25-28; Salmo 25; Taga-Filipos 2:1-5; Mateo 21:28-32
Sagad diha sa mga meeting ang tawo nga mohatag og sugyot mahitungod sa usa ka butang siya na usab ang pahimuon sa maong sugyot. Usahay makapawalag umoy kini sa paghatag og sugyot kay mosumbalik ra man sa mingsugyot. Sa laing bahin, timailhan pod kini kon hangtod asa kakombinsido ang maong tawo sa iyang gisugyot. Hangtod sulti ra ba siya o buhaton gayod? Bug-at ba ang iyang pulong o mapalid lang sa hangin?
Diha sa Sambingay sa Duha ka mga Anak, ang usa mibalibad sa gipahimo sa iyang amahan apan iya kining gihimo. Ang lain mitando sa gipahimo sa amahan apan wala kini niya buhata. Ang nagbuhat sa kabubut-on sa ilang amahan mao kadtong mibalibad apan mibuhat diay. Gitandi kini sila sa mga kobrador sa buhis ug sa mga babaye nga mubo og lupad. Sukwahi ilang kinabuhi sa moralidad ug sa binuhatan nga diosnon apan pag-abot ni Juan nga Magbubunyag mituo sila kaniya ug gibag-o nila ilang kinabuhi.
Ang buhat mas lanog kay sa mga pulong. Ang bunga nga tinuoray mao ang buhat. Sayon ang pagsulti apan dili pa kini mao ang bunga. Usahay man god makabuhi kita og mga pulong nga kuwang sa pamalandong o nahinaykan lamang. Sa nakapamalandong na kita, nahigmata kita sa atong kakulangan ug bag-ohon nato ang atong gilaraw o gibuhat. Mahimo diayng mabag-o ang atong hunahuna kay nakabig kini.
Giklaro ni propeta Ezekiel nga ang sangputanan sa kinabuhi sa tawo mag-agad sa iyang binuhatan. Kon ang usa ka buotan nga tawo mobiya sa birtud aron magpakasala, mamatay siya. Apan kon makabig siya ug mobuhat sa matarong, mabuhi siya. Hukman kita sa Dios binasi sa atong binuhatan.
Diha sa sulat ngadto sa mga taga-Filipos, gi-awhag ni Pablo ang mga taga-Filipos nga dili “pagbuhat bisag unsa gumikan sa hinakog nga tuyo o sa walay hinungdan nga tinguha sa pagpanghambog; hinunoa, pagpaubos kamo sa wala gayoy paghunahuna nga kamo mas mayo kay sa uban”. Kini diayng pagkakabig magsugod sa kahiladman sa tawo, sa iyang kinaiya ug panghunahuna, usa pa moawas sa iyang buhat. Mahinungdanon diay kaayo ning pagpamalandong kay diri maggikan ang pagbag-o sa binuhatan.
Tan-awon diay nato ang buhat, dili ang gisulti, aron maaninaw kon tinuoray ba o mini ang usa ka tawo. Daghan man god maayo lang sa sulti, unya walay buhat o sukwahi sa gisulti ang binuhatan. Mao kini tan-awonon nato sa natad sa ekonomiya ug sa politika, pananglit ang umaabot nga piniliay sa USA. I-ampo nato ang mga botante nga dili lang sila magpadala sa gisulti kondili tan-awon pod nila ang bunga sa binuhatan kay diri makita kon alang ba gayod sa kaayohan sa kadaghanan, sa kinabuhi ug sa bili sa tawo, banay, ug sa mga kabos ang usa ka kandidato. Nakapadangat ba ang usa ka tawo o partido sa kaayohan nga katilingbanon o hangtod sulti lang sila. Sa 2022 ato na sab nga turno.
Maayo lang ba kita sa sulti o buhaton ba gayod nato ang atong gisulti?