KARONG Martes, i-selebarar ang tinuig nga kapistahan sa lungsod sa Argao, pahinungod sa ilang patron, Senyor San Miguel Arkanghel. Usa kini sa dugukanan o dagsaan sa mga bisita gumikan sa ilang lamian nga humba ug torta. Pero nasayod ba mo nga puwerteng hasula kon mamista ka saArgao? Ang LGU sa Argao mipagawas niining mga lagda sa mamista.
Ania ang lagda. Alang sa tanang Argawanon nga nagplano nga mouli aron mamista sa karong Septyembre 26,27, 28,29 ug 30, gikinahanglan nga mokuha una og visitor’s pass gikan sa munisipyo. Kining mosunod mao ang mga gikinahanglan aron makakuha og pass.
1) Medical certificate gikan sa municipal o city health office sa lungsod o siyudad nga gigikanan sa mokuha sa visitor’s pass. Ang maong medical certificate nagmatuod nga ang hingtungdan dili person under monitoring ug dili usab person under investigation ug siya wala magpositibo ou wala dudahi nga adunay Covid 19.
2) Valid I.D, 2x2 picture, barangay acceptance letter, local government unit (LGU) acceptance letter. Ang mga requirements adto i-submiter sa Argao Tourism Office. Ang mga bisita pasudlon sa Metro Argao sa petsa nga daan nang gi-schedule para sa ilang tagsa-tagsa ka mga barangay. Kadto lang mga visitors pass nga gi-issue sa Argao LGU ang dawaton sa checkpoints.
3) Ang mga bisita tugutan sa pag-adto sa simbahan alang sa pag-ampo, pagdagkot ug pagsimba. Ang panagpundok ug mga party, pag-inum sa mga ilimnong makahubog ug hudyaka uban sa daghang tawo gidili atol sa bisperas, kahulugan ug liwas sa pista sa Sept. 30.
4) Kadto rang mga tawo nga nagpuyo sa balay ang gitugutan sa sulod sa ilang pinuy-anan ug nataran ug dili mamahimong papundohon nila didto ang mga bisita. Ang pagdawat og mga bisita ug pag-abi-abi kanila sa sulod sa ilang balay o nataran, ingon man ang pagtugot sa mga bisita pag-inum-inum sa mga ilimnong makahubog hingpit usab nga gidili. Kining tanang mga lagda gipatuman sa lungsod aron kalikayan ang pagtakod sa Covid 19. Gihangyo ang tanan sa pagsabot. (Source: Argao FB page).
Atong pangutan-on ang taga Argao, unsa man magpakaon mo o dili? Sus, kon mao man lang gani ni kahasol, maayo pay magpuyo sa balay.
(bobbygnalzaro@gmail.com)