POLICE Regional Office 7 ug militar sa Central Visayas nagtuo nga ang mga rebeldeng komunista nga New People’s Army nagtinguha nga mabawi nila ang Bohol human gideklarar nga insurgency free 10 ka tuig na ang nakalabay.
Human sa sunodsunod nga pagkasikop ug pagtahan sa tag-as nga mga opisyal sa Bohol di pa lang dugay, gitug-an ni Police Regional Office (PRO) 7 Director Brigadier General Ignatius Ferro nga adunay impormasyon nga bawion sa teroristang grupo ang probinsya gikan sa pagka insurgency free.
Matod ni Ferro nga nag tambayayong karon ang Central Command (Centcom) ug kapulisan nga mapugngan kini pinaagi sa pagbutang sa presensya sa mga pulis ug sundawo sa mga bukirang dapit sa probinsya sa Bohol ug Negros nga gituohang adunay presensya sa mga rebelde.
Tungod niini, mag umol ang kapulisan ug militar og joint focus military and police operations nga ilang ilusad sa mosunod nga mga semana sa Bohol ug Negros Oriental isip kabahin sa programa paghunong sa armed conflict.
“We conceptualize the joint focus military and police operations. So, kana will be launching in Negros and in Bohol such initiative so as to stop these CTGs (communist terrorist group) from recovering Bohol and in Negros to stop them totally if not bring them to the lowest level of affectation in Negros,”pasabot ni Ferro.
Wa usab wad-a ang posibilidad nga nag tinguha ang mga komunista nga sudlan pagbalik ang Sugbo diin sa dugayng panahon wa nay presensya sa mga NPA sa midnorth area sa probinsya.
Giangkon ni Ferro nga wa pa siya makadawat og report nga adunay armado nga nasigpatan sa bukid, apan wala sila mokompyansa tungod sa kalisud nga nasinati karon sa NPA, ilabi nga dako ang nawala sa ilang panudlanan hinungdan nga gusto nilang buhion ang ilang grupo, sama sa Bohol.
“So far, we are not monitoring any armed component here but we are not complacent because daghan man nagutom na gutom na man tong mga armado nila. So, there’s a big possibility na they will try to recover,” dugang ni Ferro.
Masaligon hinuon siya nga ang mga tawo sa Probinsya sa Sugbo di makatugot nga mobalik ang presensya sa mga NPA sa ilang barangay tungod kay naleksyon na sila diin mosamot kalisod ang ilang kahimtang.