USA ka vintage bomb sa Ikaduhang Gubat sa Kalibutan nabangalan mga alas 11 sa Sabado sa buntag, Septiyembre 26, 2020 sa usa ka residente sa Sityo back GMA, Barangay Apas, Dakbayan sa Sugbo.
Si Patrolman Alfred Talaboc sa Mabolo Police Station sa Cebu City Police Office (CCPO) nga nahinabi sa Superbalita Cebu nibutyag nga ang mga personnel sa Barangay Apas Emergency Response Team (AERT) nipahibawo kanila kalabot sa usa ka vintage bomb nga napalgan sa hawan nga dapit sa nahisgutang lugar.
Sa pagsusi sa mga pulis, ilang nasayran nga usa ka Arlyn Empiales ang nakabantay sa bomba dihang nagbungkal siya sa yuta aron mohimo og kanal nga maagian sa tubig kon mouwan.
Apan nakurat si Empiales nga samtang siya nagkawot sa yuta, dunay nilagapak ug sa iyang pagsusi, nagduda si Empiales nga kini vintage bomb.
Tungod sa kahadlok, giundang ni Empiales ang iyang gitrabaho ug dali nga nipahibawo sa barangay aron mapahibawo ang kapulisan.
Samtang si Police Chief Master Sergeant Joel Taboada, sakop sa PNP Explosives Ordnance Disposal Team, niresponde sa dapit.
Human sa pagsusi ug pagsiguro nga luwas sa peligro ang vintage bomb, gikuha kini sa iyang nahimutangan ug temporaryo una nga gipundo sa hawan nga lugar sa buhatan sa EOD sa Campo Sotero Cabahug sa CCPO. (BBT)