LAIN na usab nga out of town session ang ipahigayon sa Hunta probinsyal sa Septiyembre 28, Lunes.
Ang session ipahigayon sa lungsod sa Alegria.
Mao kini ang ika-duha nga out of town session nga naglangkob sa ika-15 nga Sangguniang Panlalawigan nga gipangulohan ni Bise Mayor Hilario Davide III.
Ang unang out of town session gipahigayon sa Isla sa Camotes.
Tinguha sa Hunta Probinsyal nga mopahigayon og upat ka out of town sessions sa usa ka tuig.
Tuyo niini nga mas mahimong duol ang serbisyo sa Kapitolyo ngadto sa mga Sugboanon.
Apan tungod sa pandemya napugngan ang pagpahigayon niini.
Sanglit ubos na man sa modified general community quarantine (MGCQ) ang lalawigan, mahimo na ang pagbiyahe ingon man ang pagpundok ubos sa limitado nga kapasidad.
Gawas sa ipahigayon nga session, may pinansyal nga ayuda usab nga iapod-apud sa mga barangay.
Gikatakda usab ang pagbukas sa mga proyekto sa lungsod sa maong higayon.
Tungod kay bukas na ang mga tourist destination sa Probinsya, nagplano usab ang pipila ka mga bokal nga mosuway sa bag-ong giabli nga tourism activity sa lungsod sa Alegria nga mao ang canyoneering.
Ang canyoneering usa sa mga tourist attraction sa Sugbo nga gikahinaman kanunay sa mga turista, lokal o langyaw. (ANV)