DIAY good news sa mga Talisaynon, labina sa mga senior citizen ug person with disability (PWD).
Usa ka ordinansahon nga gipangamahanan ni Talisay City Councilor Gail Retauro nga gipalabang sa Konseho maghatag og exemption sa parking fee sa mga senior citizen ug PWDs.
Matod ni Restauro nga kadtong mga establisimento sa Syudad nga magpabayad sa ilang parking hatagan og kopya sa maong ordinansa unya aron sila mahibawo ug ilang mapatuman.
Dugang ni Restauro nga iya kining giduso sa konseho atol sa ilang sesyon niadtong Septiyembre 15, 2020 isip tabang na sa mga edaran ug mga PWD aron makadaginot.
Ang parking fee exemption tumanon nagmaneho man ang senior citizen o pasahero lang.
Ang ordinansahon nga giulohan og “An ordinance granting qualified exemptions to all senior citizen and person with disability (PWD from the payment of parking fees in commercial establishments” magpahamtang og silot sa mga mosupak.
Alang sa mga cashier, booth o parking attendants, sa unang kalapasan makamulta sila og P500, ikaduha, P1,000 ug sa ikatulo P2,000.
Samtang ang mga operator o tag-iya sa establisemento nga di motuman sa ordinansa pahamtangan og P2,000 nga multa. Sa ikaduhang paglapas P3,000 samtang sa ikatulo P5,000.
Matod sa ordinansa nga gibase kini sa Expanded Senior Citizens Act of 2010 ug Republic Acty 7277 kun Magna Carta for Disabled Persons. (BBT)