SEMANA na kapin ang nilabay nga wa na tuguti sa Cebu City Emergency Operations Center (EOC) ang pag-home quarantine sa mga positibo sa coronavirus disease (Covid-19).
Si Cebu City Councilor Joel Garganera, deputy chief implementer sa EOC, niingon nga siya nabalaka sa home quarantine o home isolation sa mga pasyente sa Covid-19, bisan kon ang balay “suitable” para sa pag-home quarantine.
“There are still issues sa home isolation like exposure to the family, even if naa’y own room and CR,” pasabot ni Garganera.
Gisiguro ni Garganera nga adunay saktong pasilidad ang Dakbayan para mapahiluna sa mga Covid-19 nga pasyente.
Ang Dakbayan aduna pa’y upat ka mga eskwelahan nga gigamit alang sa Barangay Isolation Center (BICs) - sa Barangay Mambaling, Zapatera, City Central ug Don Vicente Rama.
Gawas sa mga BIC, ang dakbayan sad adunay duha ka dagkong isolation facility, ang New Normal Oasis for Adaptation and a Home (Noah) ug Cebu City Quarantine Center (CCQC).
Gawas sa mga pasilidad nga gipanag-iya sa gobiyerno, aduna say pribado nga pasilidad sa dakbayan, ang Bayanihan Center ug ang IEC Convention Center.
Ang Dakbayan adunay 52 ka mga BIC, apan giuli na ang ubang eskwelahan ngadto sa Department of Education (DepEd) sukad nga nikunhod na ang mga kaso sa Covid-19 sa dakbayan.
Ang maong mga eskwelahan gpang-disinfect sukad wa na kini gigamit.
Matod ni Garganera nga kinahanglan pa nga makig-meeting ang City Hall ngadto sa Local School Board ug DepEd aron pag-discuss kalabot sa nahabiling upat ka eskwelahan.
“We will sit down with Cebu City School Board and DepEd on how to go about it taking into consideration that the health and safety of the teachers is primordial,” matod niya.
Alang kang Garganera, ang bag-ong guideline nga gipagawas sa Inter-Agency Task Force (IATF) usa ka nindot nga development.
“The new resolution is really prudent because there’s more control on the part of the government in monitoring the patient,” segun ni Garganera.
“So the new guideline is a welcome development which will help contain the virus,” matod niya.
LAHI SA MANDAUE
Sa usa ka phone interview, si Atty. John Eddu Ibañez, executive secretary ni Mandaue City Mayor Jonas Cortes, niingon nga ang siyudad magpadayon sa existing protocol kay ang resolusyon nagtugot sa isolation sa balay basta nakapasar kini sa mga rekisitos sa Department of Health (DOH).
Sa Septiyembre 25, ang Mandaue City dunay og 170 ka aktibong mga kaso, diin 50 ka mga pasyente naa sa Mandaue City Central isolation unit apan pipila naa sa home isolation, private isolation clinic o ospital.
Apan kon ang IATF momando nga ang tanang mga pasyente di na tugtan nga maka home isolation, matod ni Ibañez nga igo ang isolation units.
Nitukod ang Siyudad og duha ka isolation facilities nga buksan na unya sa Norkis Park ug kanhi Cebu North Bus Terminal. (Dugang taho ni KFD)